Aktori Arben Derhemi, iu është përgjigjur polemikave, që vënia në skenën e Teatrit Kombëtar të shfaqjes “Prefekti” të Besim Levonjës shkaktoi. Kjo pjesë u vu për herë të parë në skenë gjatë regjimit komunist me synim propagandimin e atij regjimi dhe luftës së klasave, ku në qendër të historisë është ish-prefekti Qazim Mulleti. Shfaqja për shumë kohë ka stigmatizuar banorët e Tiranës, por sipas aktorit, këtë herë vjen e vënë në skenë krejtësisht ndryshe.
“Ne nuk kemi bërë veprën e Besim Levonjës, por veprën e Besim Levonjës të rregulluar e të parë në këndvështrim tjetër. Nëse do të vihet në skenën e Teatrit Kombëtar mendoj se do të rishihet përsëri e të thellohet nga njerëzit që merren me këtë punë”
Derhemi u shpreh se iu ka nisur linkun e leximit të pjesës, shoqatave të cilët reaguan mbi këtë shfaqje, teksa shtoi se personazhi i “Qazim Mulletit” prek dhe atë personalisht. Në të njëjtën kohë aktori nënvizoi se ka vënë në skenë dhe vepra të At Zef Pllumit, por askush nuk ka shfaqur interes.
“Shih çfarë kemi bërë ne për figurën e Qazim Mulletit. Shih çfarë kemi bërë për të vendosur në vend atë histori, atë personalitet që në një lloj mënyre më prek edhe mua, por më prek vërtetë jo se kam ndërmend të marr ndonjë fond OJF-je për këtë punë, ose të bëj peticione që të jem i rëndësishëm. Unë kam bërë një nga veprat më madhore të At Zef Pllumit, ‘Rrno për me tregu’ dhe as nuk e kanë vënë ujët në zjarr për ta parë”.
Derhemi u shpreh se historia e kombit shqiptar duhet të rishihet e gjitha dhe jo vetëm kjo vepër.
“Unë mendoj se duhet të rishihet gjithë historia e kombit, jo vetëm kjo vepër. Po u pa gjithë historia e kombit, le t’i hyjmë në qelizë kësaj pune, e të vazhdojmë deri në fund”. Arti në shumë forma të tij, ka qenë vënë me detyrim në shërbim të propagandës, ndërsa batuta filmash a pjesësh teatrale, janë përdorur gjerësisht në ligjërimin e përditshëm, madje vijojnë edhe sot.
Discussion about this post