Publikimi i tezave të Maturës në një kohë kur nxënësit i nënshtrohen testimit, përbën një shkelje të rregullores të firmosur nga vetë Ministri i Arsimit. Megjithatë, prej vitesh, ky rregull shkelet dhe tezat qarkullojnë në internet para apo teksa maturantët u nënshtrohen testimeve, që janë përcaktues në zgjedhjen e tyre për arsimimin e lartë.
Problematika u shënua sërish këtë të hënë, teksa rreth 28 mijë nxënës – sipas shifrave nga Ministria e Arsimit – zhvillojnë testimin e parë të maturës, atë të gjuhës së huaj.
Prej ditësh, ministrja e Arsimit Ogerta Manastirliu ka folur për masat e marra me qëllim evitimin e problematikave.
Një ditë më parë preku përpjekjet që sipas saj janë bërë “për një proces provimesh të organizuar dhe të sigurt”.
Të Shtunën, gjatë një takimi me monitoruesit e provimeve të Maturës Shtetërore 2024, dha edhe shifra lidhur me personelin e angazhuar për mbarëvajtjen e testimeve.
“Në të gjithë Shqipërinë janë 144 qendra ku do të zhvillohen Provimet e Maturës, dhe Ministria e Arsimit dhe Sportit do të monitorojë procesin me përfaqësues të deleguar, duke siguruar që çdo hap i procesit të garantojë transparencën e duhur. Do të angazhohen rreth 2900 mësues dhe punonjës të arsimit që do të jenë përgjegjës për mbarëvajtjen e provimit në çdo qendër provimi nga veriu në jug”, tha ministrja Manastirliu.
“Për monitorimin dhe administrimin e procesit do të angazhohen më shumë se 2900 punonjës të sistemit arsimor, përfshirë mësues, administratorë provimesh dhe staf të MAS dhe strukturave të varësisë. Do të jenë 1900 administratorë provimi që monitorojnë grupe prej 15-20 nxënësish, 200 përgjegjës të administrimit, 250 administratorë të sekretimit, 290 përgjegjës për strukturat shkollore dhe mësues ndihmës për mbështetjen e nxënësve me aftësi të veçanta. Gjithashtu janë 230 administratorë për monitorimin dhe vlerësimin e mbarëvajtjes së testimeve në të 144 pikat e provimeve”, shtoi ajo, duke paralajmëruar madje se “nuk do të ketë asnjë tolerancë për rastet që shkelin rregulloren”.
Megjithatë, pavarësisht masave të marra dhe paralajmërimeve të ministres, teza e testimit të parë të maturës ka rrjedhur online. Një problematikë kjo që përsëritet periodikisht çdo vit, duke dëshmuar dështimin kronik të autoriteteve përgjegjëse.
Discussion about this post