Është shkarkuar nga detyra drejtori i Përgjithshëm i Policisë së Shtetit Ardi Veliu. Burime konfidenciale bëjnë me dije për gijotina.com se ky vendim është marrë pak minuta më parë ndërsa ende nuk dihen arsyet që kanë çuar në marrjen e këtij vendimi.
Ardi Veliu është kritikuar vazhdimisht dhe është përfshirë në skandale, por duket se vetëm tani është marrë vendimi për shkarkimin e tij nga detyra.
Ish Drejtori i Policisë së Tiranës Ardi Veliu u emërua drejtor i Policisë së Shtetit me firmën e Kryeministri Rama, i propozuar nga ministri i Brendshëm Fatmir Xhafaj. Veliu zëvendësoi në këtë detyrë Haki Çakon, i cili u lirua më 8 janar 2018.
Vendimi për shkarkimin e drejtorit të përgjithshëm të policisë së shtetit Ardi Veliu është pritur prej kohësh, që në momentet e para që u publikuan skandalet në të cilat ishte përfshirë. Një ndër ngjarjet me sensitive ishte ajo kur 15-vjeçari u dhunua nga forcat e policisë dhe video u bë publike. Nëna e 15-vjeçarit Zaida Çobo denoncoi ngjarjen në polici. Për në një raportim në Komisionin e Sigurisë kreu i policisë së shtetit transmetoi një video ku nëna e 15-vjeçarit shfaqej me armë në duar, video e cila më pas doli bllof për shkak se Çobo është aktore, ndërsa video një nga rolet e saj. Në rrethana të paqarta Zaida Çoba tërhoqi padinë dhe u tërhoq.
Kreu i policisë së shtetit u akuzua edhe për abuzim me fondet publike. Në media qarkulluan dokumente ku rreth 100 milionë lekë iu dhanë një kompanie sigurimesh nga drejtori i Përgjithshëm i Policisë së Shtetit Ardi Veliu, për sigurimin e jetës së familjarëve të oficerëve të policisë. Kjo u realizua nëpërmjet një tenderi pa konkurrencë.
Ardi Veliu ka dalë i fituar në të gjitha skandalet që është përfshirë më parë, por duket se tani do të largohet me kokën ulur.
