Dështon tenderi 186 mln lekë i ISUV, KPP e anulon pas ankesës së tre kompanive

Tenderët nga institucionet shqiptare, më shumë sesa për të kryer një punë publike, shërbejnë për të çuar ca lekë tek kompanitë e miqve të drejtuesve. Dhe pikërisht duke vepruar në këtë mënyrë, shumica prej tyre përfundojnë në Komisionin e Prokurimeve Publike nga ankesat e kompanive pjesëmarrëse. Në këtë “valle”, kësaj radhe është futur edhe Instituti i Sigurisë Ushqimore dhe Veterinarisë (ISUV).

ISUV ka hapur një tender në datën 13 dhjetor 2021, me qëllim blerjen e materialeve laboratorike. Kjo procedurë mban numrin e referencës REF-11310-11-12-2021 dhe ka fondin limit prej 18.592.269 milionë lekë të reja, ose rreth 186 milionë lekë të vjetra. Në garë kanë marrë pjesë 4 kompani, “Isometric ” SHPK, “Almedical” SHPK, “Gamma” SHPK dhe “Krijon” SHPK. Por siç duket, skema e skualifikimi të të gjithë operatorëve përveç fituesit, është ndjekur edhe në këtë procedurë. Kështu, tre kompanitë “Almedical” SHPK, “Gamma” SHPK dhe “Krijon” SHPK janë skualifikuar nga gara dhe duke qenë e vetme, fitues është shpallur kompania “Isometric ” SHPK.

Tre kompanitë e skualifikuara, janë skualifikuar me arsyetimin se dokumentacioni që kanë paraqitur ka mospërputhje. Duke i konsideruar arsyet si jo të qëndrueshme, kompanitë e skualifikuara i janë drejtuar me një ankesë KPP-së për këtë tender. Pasi e ka marrë në shqyrtim ankesën, KPP ka dalë në përfundim se ISUV nuk u është përmbajtur kërkesave, ka paqartësi në paraqitjen e parametrave specifikë të kërkuar, etj. Pra, edhe pse është i qartë në kërkesat që ka vënë, ISUV ka skualifikuar tre kompanitë padrejtësisht nga gara. Kështu KPP u ka dhënë të drejtë 3 kompanive që e ankimuan tenderin dhe ka detyruar ISUV të anulojë tenderin.

Skema e skualifikimit të të gjithë operatorëve në shkelje të ligjit, përveç fituesit, njihet si metodë kur një institucion shtetëror bën një tender për të çuar disa nga taksat e shqiptarëve tek kompania e paracaktuar e më pas për t’i ndarë me miqtë. Këtë gjë provoi edhe drejtori i ISUV, Armand Reveli, por që kësaj radhe nuk i eci që 186 milionë lekë t’i çonte atje ku donte ai dhe jo në shërbim të institucionit që drejton.

Gijotina.com