Drejtoria Rajonale e Policisë në Prizren ka dhënë detaje të reja për rastin e tentativës për përdhunimin e një vajze, nga një shtetas i Shqipërisë. E mitura nga Prizreni ka raportuar se me 9 nëntor, ndërsa ishte duke u kthyer nga shkolla, një person i panjohur ka tentuar ta dhunojë seksualisht. Menjëherë pas denoncimit, Policia ka nisur hetimet dhe deri më tani ka bërë me dije se agresori është identifikuar me inicialet M.XH.
“Me datë 9.11.2021, rreth orës 17:30, një viktimë femër e mitur, ka informuar se kur ishte duke u kthyer nga shkolla, një person i pa njohur ka tentuar ta dhunojë. Njësia përkatëse policore kishte filluar hetimet, pasi në bazë të raportimit të viktimës i dyshimti ishte i panjohur. Gjatë hetimeve nga njësia e specializuar nga drejtoria rajonale në Prizren, përmes informatave inteligjente dhe duke bashkëpunuar me qytetarë, hetuesit rajonal kanë arritur të bëjnë identifikimin dhe ndalimin e personit të dyshimtë për rastin tentim dhunimi”, ka njoftuar policia kosovare.
I dyshuari i moshës 30-vjeçare është shtetas i Shqipërisë, me qëndrim të përkohshëm në Prizren, ndërsa është arrestuar ditën e sotme.
Discussion about this post