Këtë të diel, “Piranjat” në “Abc” të moderuar nga Arilena Ara dhe Florjan Binaj, kanë trajtuar ngjarjen e rëndë që bëri bujë në të gjithë kufijtë shqiptarë dhe jo vetëm, atë të dhunës së ushtruar nga një infermiere në Pejë ndaj të moshuarës, e cila ishte dhe nëna e dëshmorit të UÇK-së, Taulant Nuraj.
Për të parë se çfarë ndodh brenda qendrës “Orenda” në Pejë, udhëtoi gazetarja Ledjona Xheladinaj, e cila fillimisht komunikoi me të afërmit e infermieres Aurona Pelaj, e cila kreu dhe aktin e rëndë ndaj të moshuarës.
Për babain e Auronës por dhe për xhaxhain e saj kjo ishte një ngjarje mjaft e rëndë, dhe për këtë ata i kanë kërkuar falje jo vetëm familjarëve të të moshuarës por mbarë opinionit publik.
Ndërkohë gazetarja vizitoi nga pranë dhe qendrën “Orenda” ku komunikoi me pronarin e këtij institucioni, stafin por dhe me vetë të moshuarit që banojnë aty.
Nga ajo që dëgjojmë nga të moshuarit të cilët pavarësisht se janë nën survejimin e rreptë të stafit, kuptojmë që rasti i nënës së dëshmorit Taulant Nuraj, nuk është i izoluar dhe as i vetmi.
“Rrimë mirë se kemi frikë. Kemi frikë se na rrahin nëse nuk rrimë mirë. Po u bëmë problem, këtu na kanë në dorë”, shprehet një prej të moshuarave për kamerat
Ajo që bie edhe më shumë në sy shihen gjestet që bën pronari ndërsa ndërhyn kur flasin të moshuarit, duke dashur të tregojë se janë duke folur më shumë seç duhet.
Discussion about this post