Tre persona, që dyshohet se janë pjesë e krimit të organizuar janë vënë në ‘lupën’ e autoriteteve për sulmin ndaj Top Channel, ngjarje ku mbeti i vrarë roja i sigurisë, Pal Kola, 60 vjeç.
Gazetari Elton Qyno shkruan se ata po mbahen nën survejim, por identitetet e tyre nuk bëhen me dije për shkak të hetimeve.
Gjithashtu, Prokuroria së fundmi i është drejtuar me një letërporosi autoriteteve të “Europol” në Francë, duke kërkuar ndihmë për ekzaminimin e dy profileve gjenetike, që janë gjendur në gëzhojat e sekuestruara në vendin e krimit.
Përgjigja e ekzaminimeve do të hedhë akoma më shumë dritë mbi personat e përfshirë në ngjarje, ndërsa shkaqet e sulmit nuk dihen.
Sulmi i rëndë ndodhi pak pas mesnate më 27 mars dhe viktimë mbeti roja i sigurisë, Pal Kola 60 vjeç. Autorët iu afruan objektit të televizionit me një ‘Range Rover’ dhe qëlluan me dy kallshnikovë.
Më pas, ata u larguan në drejtim të Kasharit, u futën në autostradën Tiranë-Durrës dhe morën rrugën për në Golem ku dhe dogjën makinën e përdorur në krim. Policia ka kërkuar ndihmë nga qytetarët për informacione të vlefshme dhe si shpërblim ofron shumën prej 100 mijë eurosh.
Discussion about this post