Të tjera detaje janë zbardhur nga vrasja e Edmond Mustafës, shqiptarit që u ekzekutua në qendër të Tivarit (Mali i Zi) . Sipas mediave malazeze, Mustafa konsiderohej si person i afërt me klanin Skaljar.
Lidhur me krimin, policia ka ndaluar disa orë pas vrasjes së Mustafës, Dino Ibrahimoviçin (28-vjeç), i cili konsiderohet të jetë pjesëtar i të njëjtit grup kriminal.
Vrasësi i maskuar, siç raportojnë mediat malazeze, i është afruar Mustafit nga mbrapa, ndërsa ai po i afrohej veturës në shoqërinë e motrës së tij dhe ka qëlluar disa herë me armë. Më pas është larguar me vrap. Mustafa humbi jetën në vendin e ngjarjes, pavarësisht përpjekjeve për ta mbajtur në jetë.
Iku me një skuter
Policia malazeze konfirmoi dje se edhe i vrari edhe vrasësi i përkisnin të njëjtit klan dhe se Ibrahimoviç tentoi të arratisej me skuter, por u arrestua shpejt. “Për një periudhë jashtëzakonisht të shkurtër kohore dhe në bazë të përshkrimit të kryerësit të veprës, i dyshuari është penguar të arratiset”, thuhet në njoftimin e Drejtorisë së Policisë.
Në momentin e arrestimit, i dyshuari ka qenë duke vozitur një skuter elektrik dhe ka pasur kaskë.
Policia gjeti një çantë udhëtimi të zezë me një pushkë automatike.
“Dyshohet se D.I, duke përdorur një pushkë automatike që u gjet në afërsi të vendndodhjes së tij, i ka marrë jetën EM duke gjuajtur disa predha nga arma”, thuhet në njoftim.
Sipas informacioneve jozyrtare, si viktima, ashtu edhe i arrestuari Ibrahimoviç janë të afërt me klanin Škaljar.
Viktima dhe autori i dyshuar i krimit, sipas raportimeve, kanë qenë shokë. Spekulohet se pas vrasjes së një prej krerëve të klanit Skaljar, Alan Kožar, në Korfuz në vitin 2020, Mustafa filloi të publikonte pretendime në rrjetin social Tiktok se pas likuidimit qëndronin “tradhtarë nga klani Skaljar” .
Ai dyshohet se ka publikuar korrespondencën sekrete të Sky-it, po ashtu është thënë se ka “fluturuar” dhe është ofruar në polici si i penduar, tregon burimi i Kurir-it dhe shton se Mustafa dyshohet se ka folur në Mal të Zi se “do të vërtetojë se nuk kanë qenë vetëm ‘Kavçanët’ që kanë bërë krime”.
Një tjetër motiv për likuidimin nga anëtarët e klanit të cilit ai vetë i përkiste është se, pas vrasjes së bashkëpunëtorit të tyre Zijad Nurkoviq në Spanjë në vitin 2019, Mustafa hyri në lidhje dashurie me të venë e tij, blogeren malazeze Vasilisa.
Në korrespondencë përmes Sky, siç raportojnë mediat malazeze, janë shkëmbyer mesazhe mes kreut të klanit Kavaç, Radoje Zvicer dhe policëve që dyshohet se kanë punuar për të gjatë vitit 2020. Në mesazhe dyshohet se komentojnë se Mustafa është në rrezik nga “të tijtë” për shkak të blogeres malazeze. Në atë komunikim u zbulua gjithashtu se “Kavçani” kishte planifikuar rrëmbimin e Mustafës, duke thënë se do të pranonte të ishte “dëshmitar/bashkëpunëtor dhe se do të zbulonte autorët për të paktën 20 vrasje”.
“Doni të më vrisni mua, duan ‘Kavçanët’, njerëzit e mi duan të më vrasin tani që jam në lidhje me gruan e Zijadit”, thuhet në mesazhin e dërguar nga Mustafa përmes Sky drejt një polici të arrestuar. Zijad Nurkoviq, ishte kumbari i Alan Kozharit, me të cilin Mustafa ishte edhe i afërt. Ai u likuidua përballë Vasilisë, e cila në atë kohë ishte shtatzënë.
Vasilisa Nurkoviç rregullisht reklamonte në Instagram për bashkëshortin e saj të vrarë Zijadin, ndërsa së fundmi shpesh publikonte foto me të dashurin e ri, të cilit ia fshihte gjithmonë fytyrën. Së fundmi ajo u mburr para ndjekësve me tatuazhin e saj me numrin shtatë, të cilin e prezantoi si simbol të dashurisë së saj të re. Gjithashtu, influencuesja publikonte shpesh foto të dhuratave të shtrenjta që merrte, si dhe shfaqte edhe një unazë.
Discussion about this post