Kreu i grupit mercenar rus Uagner, Yevgeny Prigozhin, është varrosur sot nga rrethi i ngushtë i familjes, ka njoftuar kompania e tij Concord Managment.
Siç raporton CNN, kjo kompani nuk ka precizuar se kur është mbajtur ceremonia e varrimit.
“Ata që duan të përshëndeten mund ta vizitojnë varrezat Porohovsko në Shën Petersburg”, thuhet ndër tjera në kumtesën e kompanisë ruse.
Disa orë pasi nga Kremlini është bërë e ditur se presidenti rus Vladimir Putin nuk do të marrë pjesë në varrimin e kreut të grupit Uagner, mediat ruse filluan të raportojnë se në varrezat e Shën Petersburgut janë vërejtur grupe të mëdha të njerëzve që shkonin për t’i dhënë lamtumirën e fundit kreut të grupit mercenar rus.
Prigozhin humbi jetën javën e kaluar kur një aeroplan u rrëzua në periferi të Moskës.
Aksidenti ndodhi dy muaj pasi Prigozhin me luftëtarët e tij organizoi rebelim kundër zyrtarëve të lartë të ushtrisë ruse – duke arritur të marrë nën kontroll qytetin Rostov. Megjithatë pas tërheqjes dhe arritjes së marrëveshjes me Kremlinin, ishte larguar për në Bjellorusi në këmbim të amnistisë.
Discussion about this post