Deputeti i Partisë Demokratike, Xhelal Mziu i është përgjigjur mbrëmjen e sotme akuzave të lëshuara në drejtimin e tij nga Nard Ndoka. Ndoka deklaroi ditën e sotme në një intervistë për mediat tha se Xhelal Mziu është një nga ata që kanë paguar para te Basha për t’u futur në listën e kandidatëve për zgjedhjet e 25 prillit, metodë kjo sipas Ndokës e cila do marrë fund falë Berishës.
Mirëpo, Xhelal Mziu ka paralajmëruar mbrëmjen e sotme një padi për Ndokën, për të cilin tha se tani filloi ‘të lëshojë diarrenë e shpifjeve’, dhe duke shtuar se Ndoka, në gjithë karrierën e tij politike, nuk ka bërë asgjë veçse të bëjë pazar me veten e tij dhe partinë.
“Tregtari i partive, Nard filozof Ndoka, paska lëshuar sot një nga ato bëmat e tij filozofike duke më akuzuar mua për një gjë që e ka bërë vet prej 30 vitesh. Nardi, është mësuar të shesë e të blejë partinë dhe tani që është katandisur me 200 vota në Shkodër (unë në Dibër realizova fitoren e 9, nga 9 beteja), ka filluar të lëshojë diarenë e tij shpifëse në media e rrjete sociale.
Nardi, në gjithë karrierën e tij politike, nuk ka bërë asgjë veçse të bëjë pazar me veten e tij, partinë dhe normalisht kjo është e vetmja mënyrë që njeh të bëjë politikë. Shit parti, blej ministri, blej parti e shit dinjitetin e tij. Duke u shitur e duke u blerë, herë shkonte te majta e herë tek e djathta.
Tani që ka mbetur thjeshtë një gaztor në “birucën e matrapazit”, e ka lëshuar vetën saqë gafat e tij i beson si shprehje filozofike. Në fakt me gaztorin e së keqes nuk vlen as të harxhosh rreshta në Facebook, por e keqja është e shkuara në këtë vend. Me filozof Nardin, do të përballem në gjykatë duke e paditur për shpifje” – shkruan Mziu.
Discussion about this post