Dhuna që pjesëtarë të fisit Rraja në Krujë ushtruan ndaj dy kushërinjve nga fisi Maja vijon të komentohet, ndërsa Policia ende nuk ka mundur të arrestojë dy vëllezërit dhe djalin e deputetit Rrahman Rraja, që konsiderohen si organizatorët e dhunës.
Deputeti ka dorëzuar mandatin përmes një shkrese drejtuar Kuvendit, ndërsa i ka bërë thirrje djalit të tij të dorëzohet.
Konflikti mes dy fiseve në Borizanë të Krujës nisi për shkak të një guroreje që zotërohej nga Rrajat, por shpërthimet në të, kishin dëmtuar banesat e fisit Maja.
Personat e dhunuar kishin protestuar e ankuar në organet ligjzbatuese, por s’kishin marrë zgjidhje. Pak ditë më parë ato, teksa bisedonin me inxhinierin e gurores, u sulmuan nga të paktën 10 persona, me armë e shkopinj bejsbolli.
Video u bë virale, ndërsa ka dyshime se ajo është shpërndarë nga vetë ata që kryhen dhunën, ndoshta për të treguar fuqinë e tyre.
Eksperti i kriminalistikës Artan Rexhepi, i ftuar në studion e Neës24 ka komentuar ngjarjen në fjalë, ndërsa u shpreh se problemi është te arroganca dhe mesazhi që përcjellin këta personazhe, të cilët flitet se e kanë shpërndarë vetë videon e rrahjes.
Ai shtoi se duhet hetuar mbi lidhjen e anëtarëve të këtij fisi dhe reputacionit të tyre me të afërmin e tyre, Rrahman Rraja që është edhe deputet në radhët e PS-së.
“Problemi është te mesazhi dhe arroganca që kishin ata njerëz që kryen rrahjen. Flitet se ata e kanë shpërndarë vetë videon e rrahjes. Fisi tjetër ka shkuar disa herë në polici dhe nuk i kanë marrë kallëzimet. Personat përgjegjës që nuk kanë bërë kallëzimin nuk duhet ta shohin më uniformën e policisë, madje edhe të hetohen.
Duhet parë nëse ky fis ka pasur probleme para apo pasi një anëtar i tyre u bë pjesë e politikës. Duhet parë nëse reputacioni i tyre u rrit pas përfshirjes në politikë. Duhen rritur shumë filtrat e ingranimit të njerëzve në politikë.
Në komisariatin e Fushë Krujës ka enklava të krimit. Edhe policët janë njerëz dhe kanë meritë për intutitën. Urdhrat vijnë nga lart poshtë. Po këta policë kanë punuar në vitin 1997 mes plumbave për paga qesharake. Por politika vetë ka ngarkesë në këtë histori. Kur shikon lidhjet se dikush është djali i deputetit ai intimidohet”, u shpreh ai.
Discussion about this post