Prokuroria e Tiranës ka ndryshuar akuzën nga “plagosje e rëndë me dashje, në bashkëpunim” në “plagosje të lehtë me dashje” për pjesëtarët e fisit Rraja që goditën me shkopa bejsbolli dhe mjete të tjera të forta dy kushërinjtë e fisit Maja.
Ndryshimi i akuzës, sipas raportimeve, ka ardhur pas akt-ekspertimeve mjeko ligjore ndaj dy kushërinjve.
Akuza e re që rëndon mbi pjesëtarët e fisit Rraja, sipas Kodit të Procedurës Penale, dënohet nga gjobë në 2 vite burg.
Gjithashtu për të vijuar hetimin lidhur me ngjarjen që tronditi opinionin publik dhe që u pasua me dorëzimin e mandatit të deputetit nga Rrahman Rraja, pasi vëllezërit dhe djali i tij ishin protagonistë në konflikt, por edhe me largimin e Bledi Çucit nga posti i ministrit të Brendshëm, duhet që pala e dëmtuar, pra kushërinjtë Maja të ankimojnë çështjen.
Bilbil dhe Jashar Maja u sulmuan me mjete të forta në një lokal në fshatin Borizanë, pasi ishin ankuar për një gurore që ishte në pronësi të Rrajave. Pjesëtarë të fisit Maja pretendonin se nga shpërthimet që ndodhnin në gurore, ishin dëmtuar banesat e tyre, ndërsa Policia lokale e Krujës nuk kishte ndërhyrë.
Pas akteve të dhunës, i gjithë komisariati i Krujës u shkri, ndërsa forcat policore nga Tirana morën në dorë situatën.
Policia arriti të ndalojë disa prej personave që u përfshinë në konflikt, por djali i deputetit, që më pas dorëzoi mandatin dhe dy vëllezër të tij, nuk u ndaluan.
Si ndodhi ngjarja
Bilbil dhe Jashar Maja u dhunuan me mjete të forta, shkopinj gome apo druri, si dhe qytat e pistoletave, nga të paktën 10 persona, pjesa më e madhe e të cilëve pjesëtarë të fisit Rraja.
Mes personave që u përfshinë në ngjarjen e rëndë dhe që rezultojnë të shpallur në kërkim janë edhe Flamur dhe Xhelal Rraja, vëllezërit e deputetit socialist Rrahman Rraja.
Disa orë pas ngjarjes dhe pas mediatizimit të saj, Policia njoftoi se kishte shoqëruar në komisariat disa persona, mes të cilëve edhe Xhelal Rrajën. Ky i fundit pasi është marrë në pyetje u la i lirë, ndërkohë që sot Policia e shpalli në kërkim.
Në ngjarjen e rëndë veç dy vëllezërve të deputetit është i përfshirë edhe djali i tij, Rexhep Rraja.
Por emri apo inicialet e këtij të fundit nuk përfshihen në komunikatën apo njoftimin zyrtar të Policisë, qoftë te personat e ndaluar, qoftë te ata të shpallur në kërkim.
Policia arrestoi lidhur me dhunimin e dy vëllezërve Maja shtetasit Ineidi Rraja, Eni Kullaj, Kujtim Përdaku, Andi Rraja, ndërkohë që shpalli në kërkim shtetasit Xh. Rr., 65 vjeç, F. Rr., 55 vjeç, dhe K. Rr., 31 vjeç.
Discussion about this post