Duke marrë shkasë nga rastet e shtuar të dhunës në familje kohët e fundit në vendin tonë, deputetja Erisa Xhixho ka dorëzuar në Kuvend një draft përmes të cilit kërkon rishikimin e ligjslacionit dhe përforcimin e dënimeve për këto raste. Ndërkohë ditën e sotme, përmes një postimi në rrjetin social Facebook ajo shkruan se, i ka kërkuar Kuvendit që drafti i dorëzuar nga ajo dhe nga Iris Luarasi të merren në shqyrtim brenda këtij muaji pa humbur më shumë kohë.
“Në përgjigje të interesimit të madh të shumë shoqatave dhe organizatave që mbrojnë të drejtat e grave dhe fëmijëve të dhunuar veçanërisht, të opinionit publik por edhe të shumë institucioneve kushtetuese, për të bërë efektive nismën ligjore për miratimin sa më parë të projektligjit “Regjistri Kombëtar i të dënuarve për krime seksuale” po ju bëj me dije se i jam drejtuar me një letër kryetares së Kuvendit, me anë të së cilës i kërkoj përshpejtimin e procedurave për përfshirjen e të dy drafteve të paraqitura, njërin nga unë dhe tjetrin nga zonja Iris Luarasi në kalendarin e punimeve të Kuvendit brenda këtij muaji që është edhe muaji Fiongos Blu që simbolizon ditët ndërkombëtare kundër dhunës ndaj fëmijëve dhe të drejtat e tyre”, shkruan ajo.
Në letrën e dërguar kryetares së Kuvendit Lindita Nikolla, ajo është shprehur se legjislacioni shqiptar për të parandaluar dhunën në familje dhe krimet seksuale ka shumë mungesë. “Meqenëse që prej shumë vitesh janë bërë përpjekje për të rregulluar me ligj mungesën në legjislacionin shqiptar të detyrimit për të krijuar regjistrin kombëtar të të dënuarve për krime seksuale, por që gjithnjë kanë mbetur përpjekje në tentativë, e ndërmora këtë nismë për të bërë të mundur që edhe në Shqipëri të aplikohet një standard ligjor i njëjtë si në shumë vende të BE-së edhe për këtë kategori njerëzish të dënuar për krime seksuale”, shprehet Xhixho. Ndërsa ka theksuar se duhet të ashpërsohet legjislacioni dhe duhen mbrojtura më shumë viktimat e dhunës.
Discussion about this post