Gjykata e Durrësit ka caktuar masën e sigurisë “arrest në burg”, me afat 45-ditor, për dy personat e arrestuar në lidhje me dhunimin e kamerierit 18-vjeçar në Mal të Robit, Golem.
Florian Habilaj, një prej pronarëve të hotelit, dhe Enold Dragoti, të arrestuar nga Policia e Kavajës, akuzohen nga Prokuroria për veprën penale të plagosjes së rëndë me dashje.
Ndërkohë, në orën 12:30 pritet të zhvillohet seanca për caktimin e masës së sigurisë ndaj Melison Nelës, xhaxhait të 18-vjeçarit Genti Nela. Ai u arrestua pasi në automjetin e tij u gjetën një armë zjarri kallashnikov, tre karikatorë dhe 84 fishekë luftarakë.
Sipas Policisë, 47-vjeçari po shkonte drejt hotelit me qëllim hakmarrjen për dhunën e ushtruar ndaj nipit të tij.
Konflikti nisi për pagesën e punës
Ngjarja dyshohet se nisi pas një konflikti lidhur me pagesën e punës së 18-vjeçarit, i cili punonte si kamerier në një hotel në Mal të Robit.
Sipas hetimeve paraprake, Genti Nela u dhunua pas konfliktit dhe më pas u dërgua në Spitalin e Kavajës për të marrë ndihmë mjekësore.
Për ngjarjen u arrestuan Florian Habilaj, 28 vjeç, dhe Enold Dragoti, 20 vjeç, ndërsa Arbër Habilaj, 36 vjeç, është shpallur në kërkim. Personat e dyshuar janë pjesëtarë të familjes së pronarit të hotelit ose persona të afërt me ta.
Pas dhunimit të 18-vjeçarit, situata rrezikoi të përshkallëzohej më tej. Sipas Policisë, xhaxhai i tij, Melison Nela, pasi mësoi për ngjarjen, u nis i armatosur drejt hotelit me qëllim hakmarrjen.
Ai u ndalua nga efektivët pranë hotelit. Gjatë kontrollit të automjetit, në një çantë u gjetën kallashnikovi, tre karikatorë dhe 84 fishekë luftarakë. Për këtë arsye, 47-vjeçari u arrestua për armëmbajtje pa leje.
Nga hetimet ka rezultuar gjithashtu se pas konfliktit vendi i ngjarjes ishte pastruar, ndërsa sistemi i kamerave të sigurisë ishte dëmtuar. DVR-ja ishte hequr dhe kabllot e kamerave ishin prerë.
Hetimet vijojnë për zbardhjen e plotë të rrethanave të ngjarjes dhe përcaktimin e rolit të secilit prej personave të përfshirë.
Pas vendimit të gjykatës, avokati i dy te arrestuarve, Altin Sinella, kundërshtoi akuzën dhe e cilësoi ngjarjen si një sherr të zakonshëm.
“U la me afat 45-ditor për t’u analizuar ekspertiza mjeko-ligjore, që në fakt është farsë, është e stisur. Janë dëmtime të lehta sipërfaqësore, por për të motivuar arrestin u akuzuan për plagosje të rëndë. Është një rrahje e rëndomtë. Një sherr mes të rinjsh”, deklaroi avokati.
Discussion about this post