Dhunë në “Foltoren” e Berishës? Kush është gruaja me hematoma në spital

“Foltoret” e ish-kryeministrit Sali Berisha janë bërë një nga ngjarjet më të më komentuara dy muajt e fundit, ku në gjendje emocionale të rënduar ka pasur dhe thirrje për dhunë nga pjesëmarrësit në takim.

Në fakt, duket se një thirrje e tillë është bërë realitet në takimin e fundit të Berishës me mbështetësit, si për ironi, në atë të Lidhjes Demokratike të Gruas.

Mësohet se, në takimin e së dielës në hotel “Rogner”, është nxjerrë me dhunë nga salla anëtarja e PD, Violeta G., duke i shkaktuar hematoma të shumta dhe duke përfunduar në spital. Dyshimet janë se gruaja mund të ketë qenë një përkrahëse e liderit aktual të opozitës, dhe mund të ketë shkruar për të sabotuar “Foltoren” e ish-kryeministrit.

Pavarësisht lajmeve që qarkullojnë nëpër media, ende nuk ka pasur një reagim për ngjarjen në fjalë, as nga lideri i PD, Lulzim Basha, apo dhe nga gruaja e dhunuar.

Nëse ngjarja në fjalë rezulton e vërtetë dhe ka pasur dhunë ndaj grave në takim, atëherë kjo vë në pikëpyetje rikthimin e bujshëm që pretendon Berisha, pasi nuk mund të ketë demokraci duke promovuar dhunën ndaj grave.