Dhunimi i kancelarit të Gjykatës në Elbasan, asnjë gjurmë nga autorët, sekuestrohen kamerat

Policia e Elbasanit ka shoqëruar disa persona që do të dëshmojnë për dhunën ndaj kancelarit të Gjykatës Ledio Sulkuqi.

Nuk dihen ende autorët e këtij incidenti të rëndë, ndërsa sot do të vëzhgohen edhe kamerat e sigurisë, për identifikimin e tyre.

Dhunimi i 51-vjeçarit ndodhi mbrëmjen e djeshme pranë Drejtorisë së Policisë së Elbasanit, në një nga rrugicat ku banonte Sulkuqi. Ishin kalimtarët e rastësishëm në rrugë, të cilët kanë njoftuar policinë për ngjarjen.

Sipas policisë hetimet vijojnë dhe po punohet për kapjen e autorëve. Ndërsa kancelari i gjykatës u dërgua në spitalin rajonal në Elbasan dhe ndodhet jashtë rrezikut për jetën. Pritet që pas përmirësimit të tij t’i merret dëshmia për ngjarjen.

Nuk dihen arsyet se përse është dhunuar Sulkuqi, nëse kjo lidhet me funksionin e tij apo me ndonjë konflikt personal.