Qindra shqiptarë të diasporës janë mbledhur në Mynih të Gjermanisë në një protestë ku kanë ngritur shqetësime për zhvillimet politike dhe institucionale në Shqipëri. Tubimi u shoqërua me pankarta dhe thirrje që kërkonin transparencë, llogaridhënie dhe dorëheqjen e qeverisë.
Pjesëmarrësit ekspozuan banderola me mesazhe që lidhen me çështje të debatueshme, si menaxhimi i pronave publike, ligji për zonat e mbrojtura, Paketa e Maleve, investimet strategjike, si dhe zhvillimet në Zvërnec. Protestuesit kërkuan sqarime dhe përgjegjësi nga institucionet për këto tema.
Një nga pankartat më të komentuara paraqiste fotografinë e një qytetareje të moshuar gjatë shoqërimit të saj nga policia në protestën e zhvilluar para Parlamentit, duke ngritur pyetje mbi përdorimin e forcës dhe respektimin e të drejtave të qytetarëve.
Sipas organizatorëve, protesta në Mynih është pjesë e një serie manifestimesh të zhvilluara nga diaspora shqiptare gjatë muajve të fundit në disa qytete evropiane dhe para ambasadave shqiptare, me synimin për të kërkuar më shumë transparencë dhe përgjegjësi nga autoritetet.
Tubimi u zhvillua në mënyrë paqësore, ndërsa organizatorët theksuan se do të vijojnë të ngrenë zërin për çështjet që, sipas tyre, prekin interesin publik dhe të ardhmen e vendit.
Discussion about this post