Trajneri i skuadrës së Kukësit, Diego Longo ka theksuar se skuadra e Egnatias dhe Kastriotit janë në garë për titullin kampion për shkak të barazimit që kanë marrë në duelet me Tiranën. Ai është ndalur më pas edhe tek aleancat ku i ka hedhur poshtë këto aludime.
“Edhe Kastrioti me Egnatian kanë barazuar ndaj Tiranës. I bie që edhe këto dy skuadra tani janë në luftë për titull.
Mendimet e mia janë subjektive sepse jam trajner i Kukësit. Por, mendoj se e merituam fitoren dhe barazimi nuk do të ishte diçka e drejtë apo korrekte. Fitorja besoj se ishte rezultati i drejtë.
Nuk e mendoj se ishte lodhja e Tiranës çelësi i fitores sonë. Në pjesën e dytë ata bënë gjithashtu shumë mirë.
Kjo fitore nuk ka lidhje me titullin kampion. Është një ndeshje e veçantë e Tiranës. Besoj se kampionati ynë fillon në ndeshjen tjetër ndaj Egnatias.
Kemi motivim të mjaftueshëm, pasi e dimë se çfarë na ka ndodhur në ndeshjet e shkuara, si në Kupë. Por, e dimë edhe qëndrimin e Egnatias dhe do të bëjmë lojën tonë.
Lideri ynë është grupi. Lojtarët, stafi, klubi jemi të gjithë një. Ky është lideri.
Aleancat? Përgjigjem vetëm në pyetje serioze, kjo nuk është diçka serioze. Është mungesë respekti”, tha Longo.
Discussion about this post