Dhuna është kthyer në një faktor shumë shqetësues në futbollin francez dhe po shoqëron pjesën më të madhe të ndeshjeve. Së fundmi episod dhune ka pasur në derbin Burgundy mes tifozëve të Dijon dhe Auxerre në një lokal, ndërsa do të luhej sfida e javës së 16-të të Ligue 2.
Raportohet se një grup mbështetësish të Auxerres kanë sulmuar rreth 30 tifozë vendas, të cilët po prisnin fillimin e ndeshjes në një lokal afër stadiumit raporton gazeta rajonale ‘Le Bien Public’. Nga ngjarja nuk raportohet të ketë të lënduar si dhe as të arrestuar, megjithatë shtohet se agresorët hynë dhe plaçkitën vendin, duke djegur një pjesë të mobiljeve të lokalit.
Ndërsa për këtë ndeshje, e para zyrtare që prej 2016-ës, nga prefektura Cote-d’Or kishte njoftuar se do të ndalohej hyrja e tifozëve të Auxerre në Dijon nëse nuk shoqëroheshin nga policia.
Kjo ngjarje ndodhi vetëm një ditë pas episodit të shëmtuar, kur lojtar i Marseille, Dimitri Payet, u godit me shishe në kokë nga tifozët e Lyon, gjë që çoi në ndërprerjen e takimit të Ligue 1./K.T/Gijotina.com
Discussion about this post