Kërkesa për divorc, e depozituar më 9 nëntor të vitit të shkuar, i ka marrë jetën sot Kudret Saliajt. Pas shumë akuzave për tradhëti e dhunë, i riu kishte vendosur që të ndahej nga bashkëshortja e tij, Dhurata Saliaj. Kjo e fundit ishte e dënuar për dhunë në familje, ndërsa bashkëshorti i saj kishte “urdhër-mbrotje” për vjehrrin e tij, ish-polic privat, i objekteve të rëndësisë së veçantë.
Sot, pas 5 seancash, çifti do të zhvillonte takimin e radhës me gjyqtaren Irena Plaku, e cila do të vendoste se kush prej tyre do t’i mbante fëmijët. Për bazë do të merrej versioni i djalit të madh, që do të vendoste se me cilin nga prindërit donte të rrinte. Para se ora të shënonte 12:00, palët ishin ulur për të konsumuar një kafe në pjesën e jashtme të një lokali pranë Gjykatës së Tiranës. Përveç avokatit Adriatik Cama, me viktimën në momentin e krimit ishte edhe i biri dhe një punonjëse sociale, ashtu siç edhe parashikohet nga ligji.
Para se të çoheshin nga tavolina, kur ora shënonte 11:55, ende vjehrri i viktimës, Picari ka hyrë në lokal. Para nipit të mitur, ka nxjerrë armën dhe ka shtënë disa herë me pistoletë, duke i marrë jetën në vend Saliajt. Nga të shtënat, i plagosur ka mbetur dhe avokati Cama, i cili ndodhet jashtë rrezikut për jetën. Menjëherë Policia ka mbërritur në vendin e ngjarjes dhe ka rrethuar zonën, por i mituri duke qarë ka grisur shiritin dhe është futur në lokal për të parë edhe njëherë të atin e vrarë.
Jashtë e kanë nxjerrë dy efektivë policie, të cilët e mbanin nga krahët dhe e futën në makinë për ta dërguar në Komisariat, atje ku edhe do të tregojë gjithë çfarë pa e ndodhi, para syve të tij. Autori u prangos në zonën e Yzberishtit, rreth një orë më vonë dhe më pas është dërguar në Komisariat për të dhënë dëshminë e tij.
