SPAK dhe Polica në vend të kapin kriminelë, shohin të kapin ndonjë lekë përmes tenderva me shifra marramendëse dhe me objektiva qesharake. Dy ditë më parë SPAK dhe Drejtoria e Përgjithshme e Policisë së Burgjeve me drejtues Admir Abrija, por në varësi të Gledis Nanos, kanë hapur tendera që kapin vlerën e 40 milionë lekëve. Sigurisht që këto institucione kanë nevojë për automjete në gjendje të mirë, por nuk është e nevojshme të shpenzohen kaq para çdo vit për këtë shërbim. Konkretisht me datë 23 maj Prokuroria e Posaçme Kundër Korrupsionit dhe Krimit të Organizuar ka shpallur garën për tenderin me numër Ref-28949-05-13-2022 dhe objekt “Blerje goma”. Për këtë tender, Arben Kraja ka vënë në dispozicion jo pak por 2,616,667.00 lekë të reja, ose 20 milionë lekë të vjetra. Kujtojmë se pak kohë më parë SPAK ngriti një kërkesë se i duheshin më shumë staf dhe pajisje për të zbardhur përgjigjet e bëra ndaj grupeve kriminale. Ende nuk dihet nëse stafi u përmirësua, por Kraja ka kohën të merret dhe të derdh 20 milionë lekë vetëm për disa goma makine.
Kujtojmë se 10 ditë më parë SPAK mbylli një tjetër tender sërish për blerjen e gomave dhe baterive për makinat e 17 prokurorive në vend. Edhe ky tender kapte vlerat e 20 milionë lekëve. Nuk e dimë sa goma e bateri i duhen këtij institucioni që të ketë energji, por dokumentet tregojnë që brenda një muaji 40 milionë lekë janë hedhur për rrota.
Tenderi i Nanos
Të njëjtin shembull ka ndjekur edhe miku i tij Gledis Nano. Në fakte vartësi i Nanos, drejtori i Përgjithshëm i Policisë së Burgjeve ka shpallur garën për një tender pikërisht në datën 26 maj. Rastësi apo jo edhe për këtë tender është vënë në dispozicion fondi limit 2.083.287.11 lekë të reja, ose 20 milionë lekë të vjetra. Por, në këtë rast kemi të bëjmë me një tender për blerjen e pjesëve të këmbimit të makinave. Ndërsa këtu lind pyetja, vallë sa do të shpenzojnë këto institucione kur të kenë nevojë për makina të reja?
Pasi 20 milionë lekë për pjesë këmbimi vetëm për një muaj janë shumë para. Pikërisht në dokumentin për shpalljen e tenderit thuhet se afati i punës për këtë kontratë është 30 ditë nga nënshkrimi i saj. Pra, kompania që do të fitojë do jetë “me fat” të marrë në xhep 20 milionë lekë për një muaj vetëm për të “arnuar” makinat e drejtorisë së policisë.
Ndërkohë kujtojmë se edhe ky institucion pak kohë më parë mbylli tenderin m vlerë 248 milionë lekë për të marrë 100 makina me qira. Nuk dihet nëse këto pajisjet e këmbimit iu duhen për këto makina, po për makinat që kanë qenë. Por, evidentohet qartë që policia shpenzon milion lekë për hekura. Gjithashtu evidentojmë se në çdo vit Policia e Shtetit shpenzon për makinat. Në vitin që lamë pas Policia e Shtetit shpenzoi 4.9 milionë lekë për të ndryshuar dizajnin e makinave. Këto janë vetëm disa nga shumë tënderat që këto dy institucione kanë hapur në kaq pak kohë, pasi tenderat e tjerë janë me objekte të ndryshme.
Nuk dimë nëse Nano dhe Kraja e kanë bërë me fjalë të hapin tender të njëjtë, në të njëjtën ditë dhe me të njëjtën vlerë, por dimë me siguri se 40 milionë lekë do të “fluturojnë” nga xhepat e qytetarëve tek arkat e oligarkëve/ Esmeralda Hida/
Discussion about this post