Deputeti i selisë blu, Oerd Bylykbashi, nëpërmjet një statusi në rrjete sociale, është ndalur te reformat që janë miratuar dhe priten të miratohen në vend.
Ai shprehet se për nga rëndësia, fillimisht, duhet të niset me reformën e sistemit zgjedhor, e më pas, prioritet të jetë ajo territorial. Ndërsa ka theksuar se miratimi i këtyre reformave sipas tij, kërkojnë vendime strategjike e konsultime.
“Refoma e sistemit zgjedhor për të ndryshuar sistemin e njëanshëm dhe antikushtetues të 30 korrikut 2020 duhet të jetë reforma “maestra”, e para mes të tjerave në prioritet. Pas saj, për nga rëndësia, vjen reforma territoriale, por pas saj. Njëkohshëm me territorialen duhet bërë reforma zgjedhore. Nëse ka gjë tjetër, duhet të mbajë radhën si prioritet politik. Sigurisht mund të bëhen në të njëjtën kohë që të shmangen lojërat. Ama janë të gjitha të mëdha, kërkojnë vendime strategjike, konsultime, ekspertizë e mbi të gjitha, konsensus. Nuk hidhen reformat në treg shpejt e shpejt për konsum të momentit politik, sepse përfundojnë në dizastër me pasoja afatgjata”, është shprehur ai.
Në mbyllje të shkrimit të tij, Bylykbashi ka veçuar se reformat zhvillohen nëse nuk ka përplasje.
“Reformat nuk zhvillohen kurrë të shëndetshme nëse ka përplasje e aq më pak kur nuk ka kthjelltësi të brendëshme. Përndryshe, siç thumbonte poeti satirik latin Giovenale, nuk janë reforma por veçse “panem et circenses” apo “bukë dhe cirk” që i hidhen publikut në këtë shëmbëlltyrën e deformuar e të shëmtuar të Colosseum që është kjo politika jonë ku interesi personal ka vrarë rregullisht në arenë interesin publik”, ka përfunduar ai.
Në të kundërt nëse reforma do të kthehet në një politikë, interesi personal do të vrasë interesin publik.
