Në Ditën Ndërkombëtare kundër Korrupsionit, kreu i Partisë Demokratike Lulzim Basha ka përsëritur edhe njëherë thirrjen e tij për Vetting në Politikë.
Basha shkruan në Facebook se korrupsioni po varfëron qytetarët dhe dëmton demokracinë, ndërsa shton se ka ardhur koha për një angazhim të të gjithë shoqërisë për të ecur përpara në përballjen me korrupsionin dhe të korruptuarit.
“Arsyeja pse fatkeqësisht Shqipëria renditet gjithmonë e më shumë e fundit për gjërat që ua lehtësojnë jetën shqiptarëve dhe e para për ato që ua bëjnë të pamundur atë, është korrupsioni. Është korrupsioni që varfëron qytetarët, që dëmton demokracinë, që shpopullon vendin, që vret besimin tek e ardhmja. Ndaj këtë 9 Dhjetor, Ditën Ndërkombëtare Kundër Korrupsionit, përballë kapjes së shtetit nga paligjshmëria dhe pandershmëria, është koha për një angazhim dhe mobilizim të të gjithë shoqërisë për të ecur me vendosmëri përpara në përballjen me korrupsioni dhe të korruptuarit, për pastrimin e politikës nga abuzuesit dhe njerëzit e lidhur me krimin dhe korrupsionin, për një politikë të pastër në shërbim të familjeve shqiptare dhe mirëqënies së tyre”, shkruan Basha.
Përplasja mes kreut historik të PD, Sali Berisha dhe kryedemokratit Lulzim Basha nisi kur ky i fundit e përjashtoi atë nga grupi parlamentar i PD, pas shpalljes “non grata”. Që nga ajo ditë, kanë nisur akuzat mes të dyve që pritet të kulmojnë në mbledhje e dy Kuvendeve.
Discussion about this post