Gjykata e Tiranës, me kërkesë të Prokurorisë, ka sekuestruar pasuritë e shtetasit Adriatik Gjineci, si person i lidhur me shtetasin Ismail Gjineci (djali i tij), i cili është subjekt i hetimit pasuror në bazë të ligjit “Për parandalimin dhe goditjen e krimit të organizuar”.
Organi i akuzës bën me dije se Adriatik Gjinecit i janë sekuestruar një apartament dhe dy makina, të cilat dyshohet se janë përfituar nga aktiviteti kriminal i të birit, Ismail Gjineci, i cili është arrestuar dhe dënuar për veprën penale “Trafikim i personave të rritur”.
Raportohet se Ismail Gjineci në bashkëpunim me persona të tjerë rekrutonin vajza për prostitucion në drejtim të Italisë dhe pas kryerjes së veprimeve hetimore, në vitin 2015, Gjykata e Tiranës i caktoi masën e sigurimit “Arrest në burg”.
“Nga hetimet e shtrira tek personat e lidhur me të, rezultoi se i ati i tij, shtetasi Adriatik Gjineci, me balancë negative në banka, nuk justifikon me të ardhurat blerjen e një apartamenti dhe dy makinave në pronësi të tij. Këto pasuri të paluajtshme, dyshohet se janë fituar nga personi i lidhur Adriatik Gjineci, si rezultat i përfshirjes së djalit të tij të dënuar Ismail Gjineci nga aktiviteti kriminal në ‘Trafikimin e personave të rritur”.” – njofton Prokuroria.
Pasuritë e sekuestruara në emër të Adriatik Gjinecit
- Pasuri e paluajtshme, apartament nr. 3 me sip 117.78 m,2, Pallatet “SANDY” Sh.P.K, Tiranë;
- Pasuri e luajtshme, automjet tip “Renault Scenic”; dhe
- Pasuri e luajtshme, automjet tip “Lancia Musa”.
Discussion about this post