Ish-kryeministri Sali Berisha ka reaguar lidhur me tensionet e para në veri të Kosovës, ku serbët dogjën Qendrën e Regjistrimit të Automjeteve në Zubin Potok, ndërsa hodhën granatë në atë të Zveçanit.
Me anë të një postimi në Facebook, Berisha shkruan se përqendrimi i ushtrisë serbe në kufi me Kosovës është një akt luftënxitës i Beogradit, duke shtuar se presidenti serb nuk ka njohur deklaratën që ka nënshkruar në Bruksel, si dhe ka bërë një sërë deklaratash kërcënuese.
“Përqendrimi i ushtrisë serbe në kufi me Kosovën, akt i ri luftënxitës i Beogradit.
Miq, këto dite qeveria e Kosovës në përputhje të plotë me marrëveshjen e firmosur nga palët, dmth Kosova dhe Beogradi në Bruksel, vendosi reciprocitetin për pajisjen me targa të përkohshme të makinave të Serbisë që kalojnë në Kosovë njëlloj si makinat e Kosovës që udhëtojnë në Serbi.
Ndaj këtij akti legjitim, presidenti i serbomadhisë Vuçiç dhe qeveria e tij janë sjellë në mënyrë zuzare dhe konkretisht nuk kanë njohur marrëveshjen e firmosur në Bruksel nga Ivica Daçiç e cila përcaktonte përdorimin e targave të përkohshme nga të dyja palët. Presidenti i serbomadhisë Vuçiç personalisht bëri një seri deklaratash kërcënuese ndaj Kosovës për vendimin e saj”.
Berisha nuk harroi as të përmendte vizitën e Angela Merkel në Tiranë, ku kryeministri Rama ose sic e quan ai “argati i Beogradit”, sulmoi Albin Kurtin dhe mbështeti Alexandër Vucic lidhur me nismën e “Open Balkan”.
“Të gjitha këto u paraprinë nga Minishengeni i Novi Sadit dhe Ballkani i Hapur i Shkupit de facto vendosjen e hegjemonisë serbe në rajon rrethimin e Kosovës nga klika armiqësore serbe, shqiptare, maqedonase.
U paraprinë me sulmin e turpshëm të argatit të Beogradit, Edvin Kristaq Rama ndaj Kosovës dhe kryeministrit të saj në Samitin e Nismës së Berlinit që u mbajt në Tiranë”, shkruan Berisha.
Berisha në fund të postimit të tij u bëri thirrje qytetarëve që të qëndrojnë në krah të Kosovës si dhe të mbështesin qëndrimin e drejtë të saj.
