Ministri i Punëve të Brendshme të Kosovës, Xhelal Sveçla, e ka konsideruar si akt kriminal me elemente terroriste djegien e Qendrës së Regjistrimit të Automjeteve në Zubin Potok, në kufirin Kosovë-Serbi.
Sveçla informon në Facebook se policia ndodhet në vendngjarje, teksa shton se është sulmuar edhe Qendra e Regjistrimit Civil në Zveçan.
“Sot ora 01:00 pas mesnate, nga një akt kriminal me elemente terroriste të shkaktuar nga persona të dyshimtë është djegur Qendra e Regjistrimit të Automjeteve e cila gjendet në objektin e komunës në Zubin Potok. Policia e Kosovës ka dalë menjëherë në vendin e ngjarjes dhe së shpejti do të kemi më shumë informata. Po ashtu, është sulmuar edhe Qendra e Regjistrimit Civil në Zveçan ku dyshohet edhe për një mjet shpërthyes”, ka shkruar ai.
Ndër të tjera, ministri shkruan se këto veprime tregojnë se çfarë do të ndodhte në pikat kufitare në Jarinjë dhe Bërnjak nëse nuk do të kishte prani të forcave speciale.
Pres gjashtë ditësh situata ka qenë e tensionuar në pikat kufitare Bërnjak dhe Jarinjë, ku pasi qeveria e Kosovës vendosi reciprocitetin për targat serbe, këta të fundit në shenjë proteste bllokuan rrugët në veri.
