Në intervistën e dhënë për mediat, kreu i qeverisë, Edi Rama gjithashtu ka folur edhe për marrëdhënien që ka me presidentin Meta.
Ai u shpreh ndër të tjera i gatshëm për bashkëpunim me opozitën për zgjedhjen e presidentit të ri të Republikës.
“Do kërkojmë konsultime me opozitën, patjetër dhe shpresoj që të mund t’i realizojmë konsultimet” – është shprehur Rama.
Ndonëse në dukje tonet e ashpra politike janë ulur, për kryeministrin asgjë nuk ka ndryshuar në qëndrimin e tij ndaj presidentit, të cilin vijon ta konsiderojë një fatkeqësi për shtetin.
“Komoditeti nuk është fjala e duhur edhe pse e kuptoj shumë mirë në çfarë sensi e përfshini. Unë mendoj që për shtetin shqiptar Ilir Meta ka qenë fatkeqësi për të mos thënë më shumë dhe pastaj për LSI është çështja e LSI, e asaj pjese të LSI që vijon akoma të ekzistojë” – ka thënë Rama.
Kujtojmë se me iniciativën e qeverisë, 104 deputetë nga 140 që ka gjithsej Parlamenti, votuan pro shkarkimit të Presidentit Meta, pothuajse një vit para përfundimit të mandatit të tij, në korrik 2022.
Discussion about this post