Ministria e Arsimit dhe Sportit dha urdhër që më datë 15 shtator të mbyllej kopshti “Zubeyde Hanim”, pjesë e shoqërisë ‘Turgut Ozal Education’. Vetëm pak ditë para, i njëjti vendim ishte marrë dhe për kolegjin e “Mehmet Akif”.
Ndërkohë prindërit e nxënësve që frekuentonin këtë shkollë, të cilët e kundërshtojnë këtë akt të qeverisë, po mbajnë aktualisht një protestë para godinës së Kryeministrisë në Tiranë.
Ata e cilësojnë si të padrejtë vendimin e qeverisë për mbylljen e kopshtit.
“Më duket e padrejtë. Për momentin kemi menduar këtë protestën. Kjo protestë sot do të zgjasë deri në 12 orë. Unë po pres që qeveria do bëjë diçka”, u shpreh një nga prindërit.
Janë 253 fëmijë që penalizohen nga ky vendim i qeverisë.
Protesta po organizohet nën sloganin “Reago për fëmijën tënd, Protesto për padrejtësinë”.
Kujtojmë se disa ditë më parë prindërit e fëmijëve të këtij institucioni firmosën një peticion dhe e dorëzuan në MAS për anulimin e vendimit.
Discussion about this post