Me ngjarjet kaotike në Napoli prej tifozëve të Frankfurt, duke djegur rrugët e qytetit italian, shorti i Europa League, i cili vuri përballë Romën me Feyenoord, nuk mund të mos ngjallë shqetësim.
Mjafton të kesh parasysh ngjarjen e vitit 2015, ku huliganët holandezë dëmtuan rëndë shatërvanin “Fontana della Barcaccia” në Piazza Navona, një nga monumentet më të rëndësishëm të kryeqytetit si dhe të kaluarën e afërt, ku në Tiranë, verdhekuqtë mposhtën “tulipanët” në finalen e UEFA Europa Conference League me rezultat 1-0 falë golit të Zaniolos.
Shqetësimi bëri që kryebashkiaku Gualtieri t’i kërkonte ministrit Piantedosi të ndalonte tifozët vizitorë për ndeshjet jashtë.
Sipas raportimeve nga “Repubblica”, pak pas shortit në Nion, skajet ekstreme të tifozëve të Roterdamit pushtuan rrjetet sociale me komentet e tyre.
“Shkojmë të hakmerremi, do të shkatërrojmë Romën. Do të prishim shatërvanin. Ti e rindërtove, ne do ta thyejmë përsëri”, shkruanin tifozët holandezë.
Ndërsa ata të Romës që përgjigjeshin: “Do t’ju bëjmë të vraponi si minjtë. Nëse prekni shatërvanin, do të keni pasoja”.
Pra, klima e ashpër ka filluar menjëherë dhe kjo është tepër shqetësuese.
Discussion about this post