Kanë kaluar katër vite nga grabitja e dhunshme në Fier që tronditi gjithë opinionin publik, ndërsa sot familjarja e cila ra pre e hajdutëve të rrezikshëm ka zbardhur detaje të tjera sa i përket kësaj historie. Floresha Kalemaj, së cilës iu vu jeta në rrezik dhe humbi 100 milionë lekë të vjetra, vijon t’i drejtohet gjyqtares së Gjykatës së Shkallës së Parë Fier, Matilda Sholla. Në një prononcim për mediat ajo tregon e tronditur se ndjehet e trembur nga fakti se grabitësi i 100 milionë lekëve mund të lihet i lirë.
Kalemaj, ka vënë në dispozicion edhe dokumentacionin përkatës ku tregon se ajo dhe familja e saj ndjehen të frikësuar, e madje sipas saj gjatë kësaj periudhe janë kërcënuar edhe nga prindërit e të ndaluarit.
“Ata na kanë kërcënuar me jetë në emër të djalit të tyre duke thënë se do na varnin në mes të Levanit, vend ku ndodhi vjedhja,”- shprehet ndër të tjera Kalemaj në letrën e saj drejtuar gjyqtares Sholla.
Kalemaj kërkon që bashkë me të shoqin të jetë prezent në proces, pasi janë palë e dëmtuar.
