Një avokat ka përfunduar në prangat e policisë së kryeqytetit, pasi ka mashtruar një familje, duke i marrë 12 mijë euro kundrejt premtimit se do u sillte një person të dënuar nga Italia në Shqipëri.
Shehu i kishte premtuar familjes së një të dënuari në Itali, se do të ekstradonte drejt Shqipërisë, të afërmin e tyre i cili vuan dënimin në Itali. Për të bërë këtë gjë, ai u ka kërkuar atyre 12 mijë euro, të cilat shërbejnë për vetë avokatin, por edhe personat e tjerë që ai bashkëpunon, kryesisht funksionare në Ministrinë e Shëndetësisë.
“Janë grumbulluar prova që krijojnë dyshimin të arsyeshëm se shtetasi Lavdosh Shehu, me profesion avokat, ka kërkuar një shumë prej 12.000 (dymbëdhjetë mijë) eurosh, nga familjarët e të dënuarit F. H., duke premtuar dhe siguruar se ka aftësinë për të ushtruar ndikim në funksionarë të Ministrisë së Drejtësisë, për kryerjen e ekstradimit të shtetasit F. H. nga shteti Italian, për të vuajtur dënimin në Shqipëri”, shkruhet në dosjen hetimore.
Ai ka përfituar 5 mijë euro, nga familja e të dënuarit. Kjo ngjarje ka ndodhur në vitin 2020.
Gjithashtu Gjykata e Shkallës së Parë, ka caktuar masën e sigurisë “Arrest me burg”, për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Lavdosh Shehu është ndër avokatët më të njohur në kryeqytet, ku ka marrë pjesë në disa gjyqe të cilat kanë qenë publike. Ai ka qenë avokati i familjes Çobo, për gjyqin ndaj policisë, në lidhje me ngjarjen ku u dhunua djali 15-vjeçar i familjes. Gjithashtu edhe në aksidentin në Porcelan, ku klienti i tij shkaktoi aksident me dy viktima.
