Ambasadorja e SHBA-ve, Yuri Kim ka përcjellë një mesazh adresuar shqiptarëve në ditën e sotme që përkon me 30-vjetorin e mbërritjes së ambasadorit të parë amerikan në vendin tonë. Kim shkruan se 30 vite më parë populli shqiptar shtriu dorën drejt lirisë, ndërsa SHBA e rrokën atë dorë dhe nuk e kanë lëshuar kurrë.
‘Tridhjetë vjet më parë si sot, Uilliam Rajerson paraqiti letrat kredenciale si Ambasadori i parë i SHBA në një Shqipëri të sapofutur në demokraci. Pasi theu vargonjtë e komunizmit dhe diktaturës, populli shqiptar shtriu dorën – në miqësi dhe liri – drejt popullit amerikan. Shtetet e Bashkuara e rrokën atë dorë me gëzim dhe nuk e kemi lëshuar kurrë që atëherë”, shkruan Kim.
Kim kujton momentin që do vinte në Shqipëri me rolin e ambasadores së SHBA-ve dhe kujton bisedën me ambasadorin e parë në Shqipëri, i cili sipas saj ka treguar se mbi 300 mijë shqiptarë entuziastë po prisnin ardhjen e tij në sheshin Skënderbej, duke shënuar një fillim të ri për dy vendet.
“Ndërkohë që përgatitesha për të ardhur në Shqipëri, u takova me Ambasadorin Rajerson për të marrë këndvështrimin dhe këshillat e tij. Më tregoi për ndjenjën e shpresës që kishte shënuar vitin 1991 dhe se sa i emocionuar kishte qenë si dëshmitar i vizitës së Sekretarit të Shtetit Xhejms Bejker. Mbi 300,000 shqiptarë – thuajse dhjetë përqind e popullsisë së vendit – ishin mbledhur në Sheshin Skënderbej për t’i uruar mirëseardhjen – për të përqafuar një fillim të ri midis Shqipërisë dhe Amerikës” shprehet Kim.
Teksa kujton një moment që ka shënuar kujtesën e ambasadorit Rajeson, Kim premton se SHBA do të jetë partner strategjik i Shqipërisë për të ecur drejtnjë të ardhmeje më të ndritur.
‘Ambasadori Rajerson kujtoi se kishte qëndruar pranë një polici të gjatë dhe të ngrysur shqiptar dhe kishte parë lot t’i rrëshqisnin në faqe kur Sekretari Bejker kishte thënë fjalët e famshme, “Ne jemi me ju dhe ju jeni me ne.” Ato fjalë mund të shihen si një premtim që i bëmë njëri-tjetrit – një premtim që e kemi mbajtur besnikërisht për 30 vjet, një lidhje e pathyeshme midis vendeve demokratike dhe të lira që zgjedhin të jenë partnerë, zgjedhin të jenë të çliruar nga e kaluara për të ecur përpara sëbashku drejt një të ardhmeje më të ndritur”, përfundon Kim.
Discussion about this post