Rrahman Rraja ka dorëzuar mandatin e deputetit. Rraja ishte pjesë e grupit Parlamentar të PS-së, ndërsa raportohet se pas ngjarjes së ndodhur në Borizanë, ai ka dorëzuar mandatin.
Në dhunën ndaj dy qytetarëve, u përfshinë dy vëllezërit e deputetit, të shpallur në kërkim, si dhe djali i tij, edhe ky i shpallur në kërkim.
“Nuk kam fjalë për ta shprehur sikletin karshi të gjithë atyre që më kanë besuar gjithë këto vite.
Fatkeqësisht unë dështova si prind dhe ndjehem i turpëruar publikisht nga fëmija im.
Ju kërkoj ndjesë shokëve dhe kolegëve të grupit parlamentar dhe deklaroj dorëzimin e mandatit të deputetit dhe tërheqjen time nga jeta politike.
Ju kërkoj ndjesë atyre që më kanë dhënë votën prej vitit 2000 si kryetar komune dhe prej 2 mandatesh si deputet.
Ju kërkoj ndjesë viktimave të asaj dhune turpëruese për familjen time.
I bëj thirrje djalit tim të dorëzohet para drejtësisë.
Zoti më dhëntë forcë që ta përballoj këtë dhimbje të madhe dhe jetë që ta shlyej këtë turp që më la mbi shpatulla si gur im bir.
Në fund mirënjohje dhe ndjesë edhe kryetarit të partisë dhe kryeministrit, i cili nuk më kishte asnjë borxh për këtë shqetësim kaq të madh publik që i shkaktova”, shprehet Rrahman Rraja në mesazhin e tij.
Discussion about this post