Kryedemokrati Sali Berisha u ka bërë thirrje gazetarëve që të mos e zbatojnë urdhrin e nxjerrë nga Prokuroria e Posaçme Kundër Korrupsionit dhe Krimit të Organizuar (SPAK) për të mos publikuar dosjen e bashkëpunëtorit të drejtësisë Nuredin Dumani e Henrik Hoxhajt. Në një postim në Facebook, Berisha shkruan se ky vendim është një atentat ndaj lirisë së mediave dhe se është ndërmarrë për të mbrojtur kryeministrin Edi Rama e qeveritarët. Sipas Berishës, qëllimi i SPAK është që të mos dalin zbuluar qindra telefonata që kanë qeveritarët me anëtarë të grupeve kriminale.
“Vendimi antikushtetues i Edi Ramës me SKAP-in e Partisë rikthen ligjin e Agjitacion Propagandës! Të dashur miq, Vendimi i Edi Ramës me Skap-in e tij për të dënuar me 3 vite burg gazetarët që publikojnë dëshmitë e Dumanit të qeverisë është një akt antikushtetues, censurë policeske, dhe atentat ndaj lirisë së mediave, i ndërmarrë për të mbrojtur Edi Ramën dhe qeveritarët e tij që kanë qindra orë telefonata me Dumanët e qeverise”, shkruan Berisha.
Sipas Berishës, qëllimi i SPAK është që të mos dalin zbuluar qindra telefonata që kanë qeveritarët me anëtarë të grupeve kriminale.
“Ky vendim i pashembullt në 30 vitet e fundit shënon rikthimin e ligjit e dënimit për agjitacion e propagandë të diktaturës Hoxhiste. Dënoj me forcën më të madhe këtë akt tejet të rëndë censure dhe kërkoj largimin e menjëhershëm të mercenarve të Edi Ramës nga sistemi i drejtësisë. Gjithashtu, u bëj thirrje gazetarëve të mos zbatojnë akte antikushtetuese, por të qëndrojnë të pamposhtur në mbrojtje të lirisë së mediave, dhe të publikojnë çdo telefonatë të Edi Ramës, Taulant Ballës, Erion Veliajt, Damian Gjiknurit dhe të çdo deputeti, qeveritari vendor, gjykatësi apo prokurori dhe çdo zyrtari tjetër me vrasësit serial, përdhunuesit, grabitësit e bandave të partisë. U bëj thirrje institucioneve ndërkombëtare të mbrojtjes së lirisë së mediave të dënojnë me ashpërsinë më të madhe këtë vendim të rrezikshëm”, shkruan Berisha.
Discussion about this post