DOSJA E SPAK: Paratë ikën jashtë, Bllako mori pajisjen për shishet e birrës

Në dosjen e inceneratorit të Tiranës, SPAK ka ngritur sërish akuzë ndaj Alqi Bllakos për përfitim të paligjshëm.

Në material thuhet se nën cilësinë e Sekretarit të Përgjithshëm, në mënyrë indirekte, ka përfituar në mënyrë të parregullt nga shtetasit Klodian Zoto dhe Mirel Mërtiri, vlerën monetare prej 119,755 Euro, me qëllim favorizimin gjatë procedurës së dhënies së koncesionit.

Për këtë përmendet pagesa për pajisjen “Makineri për mbushjen, mbylljen, vulosjen apo etiketimin e shisheve, makineri për gazimin e pijeve. Mjeti ka shërbyer për aktivitetin tregtar të shoqërisë së babait të tij, Edmond Bllako,i cili ka pasur si fushë veprimtarie prodhimin dhe tregtimin e birrës në qytetin Ersekës.

Kjo pajisje rezulton të jetë blerë pas kërkesës së bërë nga vetë shtetasi Alqi Bllako, me porosi të shtetasit Klodian Zoto, bërë nëpërmjet shoqërisë së bashkëshortes së tij, Ilza Zoto.

Një tjetër rast shihet dhënia e përfitimit të parregullt për shtetasin Vladimir Bezhani, gjatë kohës që ky i fundit ishte Këshilltar i jashtëm i Ministrit të Mjedisit. Kjo duke e punësuar tek shoqëria e shtetasit Klodian Zoto.

Bezhani thuhet se në sajë të pagës ka përfituar 7,520,000 lekë. Dyshimet janë se ai ka shërbyer si “urë lidhëse” për të siguruar nga Autoriteti Kontraktor dokumentacionin e kërkuar në lidhje me procedurën e dhënies së koncesionit në lidhje me kontratën e koncesionit me vlerën 128,248,330 euro ka rezultuar se Klodian Zoto dhe Mirel Mërtiri janë pronarët “de facto” të shoqërisë “Integrated Energy B.V SPV”.

Aksionerët sipas spak kanë përfituar në sajë të faturave tatimore të falsifikuara, vlerën monetare 409,428,000 lekë.

Një pjesë e madhe e këtyre vlerave monetare të siguruara në sajë të mashtrimit, janë tërhequr në cash dhe janë transferuar në mënyra të ndryshme jashtë vendit.

Ndërkaq punonjësit e Qendrës Kombëtare të Biznesit, të Regjistrit të Pronarëve Përfitues, Jetmir Llapaj dhe Silena Tola thuhet se kanë vepruar në kundërshtim me ligjin kur kanë bërë ndryshimet në regjistrin e QKB, në lidhje me aksionerët e shoqërisë holandeze “GeoGenix” ku aksionerët, janë deklaruar që të jenë shtetasit Giuseppe Ciaffaglione, Salvatore Russell dhe Alberto Presezzi.

Por SPAK shprehet se nuk është dorëzuar dhe administruar dokumentacioni shoqërues justifikues për të provuar ndryshimin. /OraNews/