Deputetja e Partisë Socialiste, Klotilda Bushka, ka reaguar pas njoftimit se ajo është vendosur nën hetim nga SPAK, pas arrestimit të kryebashkiakut të Tiranës, Erion Veliaj.
Në një postim në Facebook, Bushka shprehet se është e habitur nga përfshirja e saj në hetime dhe se nuk e kupton lidhjen e saj me këtë çështje. Ajo thekson se është mike e Ajola Xoxës dhe Erion Veliajt, por kjo nuk duhet të jetë arsye për ta përfshirë në këtë proces.
“Jam ‘pa fjalë’ prej 24 orësh që figurokam edhe unë në listën e gjatë të emrave që ka grumbulluar SPAK-u për të lënë Tiranën pa kryetar bashkie. Pyetja ime është ku hyj unë në këtë mes dhe pse duhet të më takonte sipas SPAK-ut balta që i shoqëron këto goditje,” shkruan Bushka.
Ajo gjithashtu ka kërkuar të dëgjohet nga grupi parlamentar për të sqaruar pozicionin e saj dhe deklaron se është e gatshme të përballet me drejtësinë. “Kjo është vërtet e tepërt dhe mezi pres të dëgjohem,” thekson ajo.
Discussion about this post