Ish-deputeti i PS-së, Vladimir Kosta është thirrur ditën e sotme në SPAK ku është marrë në pyetje nga prokurorët e posaçëm.
Pas daljes nga ambientet e SPAK-ut, ish-ligjvënësi socialist refuzoi të tregonte për mediat mbi çështjen që u thirr në Prokurorinë e Posaçme.
“Asgjë s’them, gjë hiç”, deklaroi ai për gazetarët.
Vladimir Kosta raportohet se është marrë në pyetje në SPAK lidhur me dosjen që çoi në burg kryebashkiakun e Tiranës, Erion Veliaj.
Ish-deputeti është pronari i SkyTower, ku ka edhe zyrat e “Harabel” Ajola Xoxa.
Erion Veliaj është arrestuar nga SPAK për krijimin e një skeme korruptive mes kompanive të bashkëshortes dhe një grupi biznesmenësh pranë tij me vlerë transaksionesh prej më shumë se 1 milion euro. Ndaj tij rëndojnë akuzat për korrupsion dhe pastrim parash. Bashkë me kryebashkiakun në akuzë është dhe bashkëshortja e tij Ajola Xoxa dhe pesë biznesmenë, mes të cilëve Shkëlqim Fusha i kompanisë “Fusha”, Gentian Sula i kompanisë Agi Kons dhe Fatmir Bektashi i kompanisë “Kontakt”.
SPAK po kryen hetime edhe ndaj deputetes socialiste, Klotilda Bushka, njëherazi kryetare e Komisionit të Ligjeve, të cilën e akuzon për kryerjen e veprimeve aktive “që pengojnë zbulimin e së vërtetës” në rastin e dosjes së Veliajt.
Sipas Prokurorisë së Posaçme, Veliaj akuzohet se së bashku me Xoxën kanë krijuar dhe vënë në funksionim një mekanizëm të ngjashëm me atë të dosjes 5D, me qëllim përfitimin e paligjshëm të fondeve publike që rridhnin nga Bashkia e Tiranës, një skemë kjo e vërtetuar sipas SPAK në nëntë raste.
Veliaj firmoste, sipas SPAK, shpërndarjen e fondeve publike ose lejeve të ndërtimit tek një grup subjektesh tregtare, të lidhura ngushtë me të, të cilët i kalonin më pas këto fonde tek një rrjet kompanish dhe organizatash jo-fitimprurëse të cilat kontrolloheshin nga bashkëshortja e tij, Ajola Xoxa dhe njerëz të afërt të saj.
Discussion about this post