Gjyqtari Ilir Panda është përcaktuar relator i çështjes së ish-kryeprokurorit Adriatik Llalla, i shpallur në kërkim ndërkombëtar për korrupsion.
Gjykata e Lartë ka regjistruar rekursin e ish kryeprokurorit Adriatik Llalla dhe me anë të shortit, Panda është zgjedhur relator i kësaj çështjeje.
Më herët ish-kryeprokurori nëpërmjet avokatit të tij mbrojtës kërkoi pezullim të dënimit me 2 vite burg. Pezullimi i vendimit u kërkua, pasi sipas mbrojtjes mbyllja e tij në qeli do i sillte pasoja të rënda për shëndetin. Megjithatë kjo kërkesë nuk është marrë parasysh nga Apeli i Posaçëm duke lënë të pandryshuar vendimin për dënimin me burg.
Sakaq, ende nuk ka një datë për shqyrtimin e pretendimeve të Llallës.
Sipas apelit të GJKKO, ish-kryeprokurori Llalla, u shpall fajtor për mosdeklarim dhe fshehje pasurie në 3 episode.
Kujtojmë se përpara një muaji Llalla u shpall fajtor për fshehje të të ardhurave në tre episode. Ish-kryeprokurorit i janë sekuestruar edhe 4 sipërfaqe trualli në total orej 22 mijë m2, në periferi të Tiranës, si dhe një apartament në Durrës.
Ai u largua nga shqipëria një javë përpara dhënies së vendimit nga Apeli i GJKKO-së, që vendosi dënimin e tij me 2 vite burg. Llalla është ish zyrtari i parë i lartë i drejtësisë që dënohet me burg. Në vitin 2018 Llalla u përfshi në listën e personave “non grata” nga SHBA. Atij dhe familjarëve të tij iu ndalua udhëtimi për në Shtetet e Bashkuara.
Discussion about this post