Drejtoria e Transportit Rrugor do të ulë me 43% rinovimin e patentës, për kategoritë vulnerabël. Përmes një postimi në faqen e saj zyrtare, DPSHTRR shpjegon që ata persona, të cilët vit rinovojnë lejedrejtimin me kufizim afati vlefshmërie nga mosha apo specifikat shëndetësore, në vetëm 2, 3 ose 5 vjet afat do paguajnë nga nëntori vetëm 2.000 lekë.
“DPSHTRR ka prioritet qytetarin dhe uljen e kostove për kategoritë sociale që rëndohen nga tarifat! Rreth 30 mijë aplikantë në vit rinovojnë lejedrejtimin me kufizim afati vlefshmërie nga mosha apo specifikat shëndetësore, në vetëm 2, 3 ose 5 vjet afat! Nga Nëntori 2021 këta aplikantë do të përfitojnë ulje drastike të tarifës nga 3,500 Lekë në 2,000 Lekë!
Pra të gjitha rinovimet e lejedrejtimeve të klasit B, me afat të kufizuar 3 ose 5 vjeçar, si edhe ato me kufizim për shkaqe shëndetësore do të kushtojnë -43%”, thuhet në njoftim.
Sipas njoftimit, ky vendim hyn në fuqi nga 1 nëntori.
