Vasfije Krasniqi e njohur me pseudonimin Goodman do të niset javën tjetër drejt Shteteve të Bashkuara për të marrë pjesë në marshimin që do të organizohet më 28 tetor para Konsullatës së Serbisë në Nju Jork, për të kërkuar drejtësi për viktimat e luftës në Kosovë, Kroaci dhe Bosnje e Hercegovinë.
Përmes një prononcimi për mediet, ajo tha se deri me tani parashikohet që ky marshim të jetë i përmasave të mëdha dhe ka si qëllim të nxisë dhe marshime të tjera, derisa të kërkohet e drejta për gratë e dhunuara dhe përdhunuara gjatë luftës në Kosovë.
Krasniqi është gruaja e parë në Kosovë që treguar hapur se është dhunuar seksualisht nga forcat serbe gjatë luftës së fundit në Kosovë.
Në mars të këtij viti, ajo është zgjedhur deputete në Kuvendin e Kosovës, si anëtare e Lëvizjes Vetëvendosje dhe ka thënë se prioritet do ta ketë luftën për të drejtat e njeriut dhe viktimat e luftës.
Në një intervistë më 21 tetor, ajo ka treguar se në marsh do të marrin pjesë edhe viktima të dhunës seksuale nga Kroacia dhe Bosnje e Hercegovina.
“Marshi është iniciativë e këshilltarit të qytetit të Nju Jorkut, Mark Gjonaj. Jemi duke bashkëpunuar që organizimi të dalë sa më mirë dhe viktimat të kërkojnë drejtësi para Konsullatës së Serbisë në Nju Jork”, tha ajo.
Marshin e kanë përkrahur shumë deputetë të Kuvendit të Kosovës, pjesëtarë të shoqërisë civile dhe artistë të fushave të ndryshme. Së fundmi, me thirrjen (Marsh për drejtësinë e saj) është parë në duar edhe artistja me prejardhje nga Kosova, Dua Lipa.
