Drejtoria e Shërbimeve Qeveritare dhe drejtuesja e saj Dhurata Frashëri u bënë ikonë e shërbëtorit të kryeministrit Rama, qysh me firmosjen e kontratës për avion privat me kompaninë “Air Albania”. Por, në përditshmëri, drejtoria kujdeset për tenderat e peshqirëve, të enëve të kuzhinës, për detergjentët, për investimet nëpër vila, për projektet e kthimit në hotele të objekteve qeveritare, për arredimin dhe ndërrimin e mobiljeve, freskimin e ajrit me kondicionerë të rinj çdo vit.
Në këtë kuadër është bërë tenderi i fundit, që ka si blerje kryesore solucionet për pishinat e vilave ku pushon kryeministri Rama dhe të ftuarit e tij.
Bëhet fjalë për tenderin me objekt “Detergjent, produkte higjenosanitare dhe aksesor në ndihmë të pastrimit për vitin 2024” të zhvilluar nga Drejtoria e Shërbimeve Qeveritare në varësi të Kryeministrit.
Ndër të tjera kërkohet të furnizohen fshesa metalike për pastrimin e pishinave të disa llojeve të specifikuara në një tabelë, Mini laborator për matjen e PH të ujit të pishinës Copë 5, Mini Laborator (pooltester) për të bërë matjen e PH dhe të klorinimit të ujit të pishinës;
Tableta për mini laboratorin matës të PH të ujit të pishinës Pako 40 (1 pako = 10 kokrra); Tableta për matjen e acidit dhe klorit të përqendruar në ujin e pishinave.
Kapëse mizash për pishinë (Copë 5) Kapëse plastike me bisht dhe me kosh me përbërje rrjete për mbledhjen e mbetjeve/mizave etj. që ndodhen në ujin e pishinës.
Klor për trajtimin kimik të ujit të pishinave (Copë 50 Klori Klar 56 %, granulat). Acid Kloridrik; Anti Alga; Algaecid (vret dhe pengon rritjen e algave në ujin e pishinës. Përbërës aktiv: n-Alkyl, dimethyl benzyl ammonium chlorides që mban ujin e pastër dhe të kthjellët. Në listë janë edhe shumë përbërës të tjerë kimikë që janë të domosdoshëm për trajtimin e ujit të pishinës përpara se kryeministri të zhytet për t’u larë.
Këto solucione i duhen drejtorisë për të larë pesë pishina në vilat qeveritare, sepse koha është ngrohur dhe udhëheqësit e shtetit do të shkojnë atje për pushime.
Kështu pa kursim, do të shpenzohen afro 80 milionë lekë për garantimin e luksit në këto vila. Me gjithë këto kimikate, me siguri do të bëhet ndonjë pastrim special, që qeveritarët të mos shqetësohen nga alergjia, se pastaj kjo ndikon në humorin dhe vendimmarrjen e tyre.
Ndërsa Tirana dhe qytetet bregdetare vazhdojnë të jenë të padizenfektuar edhe për këtë vit, si rrjedhojë e zvarritjes së tenderave. Kujtojmë se në vitin që lamë pas nuk u bë dezinfektimi sepse tenderët abuzivë u denoncuan disa herë.
Ndërsa tani në KPP ka shkuar edhe tenderi për pastrimin e pishinave të pushtetarëve. Kjo të mos ndodhte, se ne do t’i durojmë mushkonjat!
Nga titulli i tenderit nuk do ta kishim marrë vesh që ky prokurim bëhej për pishinat, por na ndihmoi denoncimi i bërë më datë 6 maj 2024 nga firma Albania Distribution Chemicals me drejtuese Mamica Jançen.
Në ankesën e depozituar pranë KPP thuhet se Drejtoria e Shërbimeve Qeveritare ka paracaktuar një fitues dhe për këtë arsye ka ndërtuar një tender me kritere që i përshtaten atij operatori. Sipas denoncuesit, në këtë tender kërkohen lëndë kimikate për pastrim, por edhe materiale të tjera pastrim, që jo domosdoshmërisht mund të jenë gjenden të gjitha tek një kompani dhe prandaj nuk duhen përfshirë në një lot.
“Duke qenë se ne si operator ekonomik kemi objekt veprimtarie tregtimin e kimikateve për trajtimin e ujit të pijshëm dhe pishinave dhe jo material pastrimi për tualete, letra higjienike, material për larjen e enëve, furçë dhëmbësh, pasta dhëmbësh, ne nuk mund të tregtojmë këto të fundit. Kjo përbën kusht për skualifikimin tonë nga kjo procedurë që në fazën e dorëzimit të mostrave dhe më pas në vlerësimin e ofertave”, shkruan Mamica Jançe.
Me pak fjalë, kjo kompani kërkon vetëm pjesën e pastrimit të pishinave, jo materialet si pasta dhëmbësh, furçe e çikërrima të tjera.
Ankimuesi shprehet se në tërësi kompanitë që shesin kimikate pastrimi, nuk kanë të përfshirë në objekt edhe materiale tualeti, prandaj e gjykon si diskriminues këtë tender dhe kërkon ndryshim të kritereve. Gjithsesi mbetet të shohim vendimin që do të japë KPP, pasi kjo është një çështje me rëndësi. Nga uji i pishinave qeveritare këtë vit varet relaksimi dhe meditimi i udhëheqjes, mund të ketë efekt ndër të tjera mbi çështje të rëndësishme për Atdheun.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post