Nga 25 tetori Tirana Parking drejtohet nga Flavio Barçi i cili ka zënë vendin e Erinda Finos, ish -drejtoresha e njohur për abuzim me fondet. Gjithmonë Tirana Parking ka qenë një arkë parash për miqtë e Erion Veliajt, por kurrë nuk ka zgjidhur problemin për parkimet në Tiranë. Përveç faturave që paguajnë për parkim qytetarët e Tiranës duhet të paguajnë vazhdimisht pajisjet që duhen për sistemin e faturimit.
Kështu, ish-drejtoresha Erinda Fino shpalli të hapur tenderin me objekt “Blerje Pjesë Këmbimi për Sistemet e Parkimit” me fond limit 50 milionë lekë.
Sqarojmë këtu se, hapësirat e destinuara për parkim menaxhohen me anë të sistemeve të parkimit të instaluara në to, të cilat janë të tipit “CAME PARKARE PKE”. Këto sisteme parkimi janë instaluar gjatë periudhave të ndryshme të administrimit të hapësirave të destinuara për parkim nga ana e institucionit dhe kushtet atmosferike, përdorimi i pandërprerë përgjatë shërbimit 24/7 që ofrohet, si dhe dëmtimet e pajisjeve nga aksidentet e ndodhura me automjetet gjatë këtij harku kohor ka bërë që të nevojiten patjetër pjesë ndërrimi për pajisjet përbërëse të këtyre sistemeve.
Pra këto pajisje nuk janë mirëmbajtur dhe tashmë do merren para nga xhepi i qytetarëve. Sikur thamë tenderin e nisi Fino me shpalljen e garës në shtator 2024, por e ka vulosur drejtori i ri Flavio Barçi.
Ky i fundit duket se ka ndjekur udhëzimet e Finos, pasi ka firmosur pa asnjë kontroll. “Adi Professional” Shpk ishte e vetmja kompani që ka dorëzuar një ofertë dhe Barçi nuk i ka prishur planet e Finos apo porosinë e Erion Veliajt dhe kështu e ka shpallur menjëherë fitues të tenderit.
Pa garë ky tender është si një dhuratë për festa. Open Data Albania ka vendosur këtij prokurimi “Flamurin e Kuq”, që është shenja e riskut të korrupsionit.
Kujtojmë se kryebashkiaku bëri ndryshime në disa drejtori për të ngatërruar publikun në një kohë që bëhen hetime nga SPAK në drejtim të tyre. Por gjithçka duket si riciklim, pasi të rinjtë po ndjekin aferat e drejtorëve të mëparshëm.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post