Partizani mori një barazim zhgënjyes ndaj Kastriotit, ku edhe pse dominoi, nuk arriti të bëjë më shumë se një goditje shtylle nga ana e Carës në pjesën e parë. Të kuqtë vinin pas një fitoreje morali ndaj Vllaznisë, por nuk mundën ta shfrytëzonin atë bonus psikologjik.
Ekskluzivisht për “Panorama Sport”, pas sfidës së mbrëmshme, ka folur drejtori sportiv i të kuqve, Elton Marini. Ai shprehet se skuadra ka humbur dy pikë me Kastriotin, por krijimi i disa rasteve të pastra, e bën të mos jetë shumë i shqetësuar për faktin se skuadra vuan ndaj ekipeve të vogla. Megjithatë, Marini kërkon më shumë agresivitet në sulm në të tilla beteja.
Partizanit nuk po i ecën shumë me ekipet e vogla në letër. E pësuat me Erzenin, ndërsa sot ju ndali Kastrioti. Çfarë nuk shkon?
Jo, në fakt do të isha i shqetësuar nëse ne nuk prodhonim dhe nuk krijonim volum, apo nuk bënim presingun ofensiv. Kemi rrezikuar shumë pak. Skuadra nuk ka rrezikuar asgjë përveç një rasti që ishte vërtet i rëndësishëm për Kastriotin. Më pas kemi krijuar volum dhe gjashtë-shtatë raste shënimi. Në momentin që nuk e shtyn dot topin në rrjetë, atëherë normalisht që mund të përdoret edhe fjala oshilacione.
A ndikon pjesa e orarit prej faktit që rivali direkt, Tirana, fitoi?
Jo, nuk besoj. E përsëris se unë do të isha i shqetësuar vetëm nëse skuadra nuk do të tregonte dhe shfaqte atë që ka bërë gjatë javës në stërvitje. E pashë skuadrën të shëndetshme, në gjendje të mirë fizike. Edhe Kastriotin askush nuk e kishte dominuar si ne sot. Megjithatë, dominimi nuk është gjithçka në futboll dhe nuk të sjell gjithmonë rezultatin e duhur. Ndoshta duhet edhe pak fat dhe sot nuk kishim dozën e duhur të fatit në krahasim me të tjerët.
Tirana fitoi, keni lënë dy pikë. Mendoni se duhet të jeni më agresivë përpara portës?
E vërtetë, kemi lënë dy pikë. Duhet të jemi më agresivë përpara portës. Duhet më shumë uri për të shënuar golin. Në momente të vështira, pa agresivitet nuk shënohen golat. Është thjesht çështje agresiviteti përpara portës.
Discussion about this post