Investohen 3.4 miliardë lekë për një pishinë në Sarandë? Investimi po bëhet nga Fondi Shqiptar i Zhvillimit dhe tenderi është firmosur nga vetë drejtori Dritan Agolli. Kush do të notojë në pishinën me lekë? Nipi i oligarkut të PS-së Sadri Abazi, që merr pjesën dërrmuese të tenderave të mëdhenj të qeverisë. Para kësaj “force madhore”, komisioni i Agollit vendosi të përdor fshesën ndaj konkurrencës.
“Skualifikim i të gjithë operatorëve konkurrues përveç fituesit. Kusht: fituesi nuk është operatori me ofertën më të ulët”, në këtë kategori e fut tenderin Open Data Albania. Mbi procedurën valëvitet një “flamur i kuq” që tregon riskun e korrupsionit.
Tenderi ka për objekt “Investime për Transformimin e aseteve publike me potencial zhvillimi në modele të standardit më të lartë të zhvillimit, Loti 3 Poli i Zhvillimit Turistik në Sarandë Faza 2”. Fondi Limit i caktuar për projektin është 332,523,279 lekë pa TVSH dhe financohet nga Buxheti i Shtetit për sektorin e turizmit.
Sipas dokumenteve, në tenderin e mbajtur më 21 gusht 2025 aplikuan 9 operatorë ekonomikë.
Megjithëse kishte mbi tryezë oferta më të ulëta, komisioni nxori fitues bashkimin e kompanive ALKO IMPEX CONSTRUCTION shpk e Arbër Abazit dhe MF INVEST GROUP shpk e Dritan Metajt.
Ky bashkim i përfaqësuar nga Abazi prezantoi ofertën 235,465,891 le pa TVSH për të kontratën me afat 20 muaj.
Komisioni i skualifikoi konkurrentët për “gabime aritmetike” në ofertë më të mëdha se 2%, por po të shihet diferenca e madhe me fituesin e tenderit, ia vlente që të merreshin në konsideratë këto propozime.
Kështu, operatori ekonomik AGI KONS SHPK propozoi vlerën 322,238,310.62 lekë pa tvsh.
Po ashtu, bashkimi i operatorëve FLED shpk & SHKELQIMI 07 shpk bëri ofertën 228,359,373 lekë pa tvsh. Ndërsa firma LIS KONSTRUKSION shpk ofronte ta bënte pishinën me 226,367,897 lekë pa tvsh.
Megjithatë, Agolli ka shpallur fitues nipin e Sadri Abazit dhe më 12 shtator 2025 ka lidhur kontratën.
Belinda Balluku, “engjëlli” mbrojtës i Arbër Abazit
Në listën e institucioneve që kanë furnizuar me para publike kompanitë e Arbër Abazit, kryeson Autoriteti Rrugor Shqiptar, i ndjekur nga Fondi Shqiptar i Zhvillimit, institucione të cilat kanë varësi nga ministrja dhe zv.kryeministrja Belinda Balluku, ku drejtuesi i ARRSH-së propozohet nga vetë Balluku.
Lidhjet e dyshimta financiare të Arbër Abazit me favorizime nga zv/kryeministrja e kanë zanafillën që nga koha e AlbControlit, periudhë në të cilën u rrit ndikimi i Ballukut brenda Partisë Socialiste.
Nga fundi i vitit 2018 do të plaste skandali me tenderin e Unazës së Madhe, tender i cili i kushtoi disa drejtorë qeverisë shqiptare duke “sakrifikuar” edhe ish-ministrin e Infrastrukturës dhe Energjisë Damian Gjiknuri. Do të ishte pikërisht ky skandal që do të largonte nga detyra Gjiknurin për t’u zëvendësuar në 17 janar 2019 nga ish-vartësja e tij, drejtoresha e AlbControlit Belinda Balluku.
Në maj 2018, kompania “ALKO-IMPEX General Construction” dhe “2 T” sh.p.k do të themelonin kompaninë koncesionare “ECO CLEANING”, e cila do të ndryshonte dhe pozitat e këtyre kompanive në tregun shqiptar, të cilat më së shumti veprojnë në fushën e ndërtimit të rrugëve dhe mbetjeve.
Por investimi më i madh i Abazit ishte kapja e Komisionit të Prokurimit Publik. Ish-kryetari i KPP, Jonaid Myzyri, i cili më parë kishte qenë jurist në kompaninë e Arbër Abazit, fillimisht hyri si specialist i thjeshtë. Por ish-kryetarja Evis Shurdha e izoloi. Myzyri u detyrua të largohej për pak kohë në Ministrinë e Inrastrukturës dhe do të delte në skenë në vitin 2019, kur Shurdhës po i dobësohej mbështetja politike. Aktualisht Myzyri është marrë i pandehur nga SPAK për korrupsion me tenderat.
Hetimet e SPAK për drejtorin e FSHZH
Ndërsa drejtori i i FSHZh, Dritan Agolli, është nën hetim nga SPAK, ndër të të tjera edhe për tenderat e projektit “100 fshatrat”. Dritan Agolli është paraqitur në SPAK në nëntor 2024. Ai është pyetur për një tender me vlerë 500 mijë dollarë të FSHZH-s për një menu të projektit “100 fshatrat”.
Tenderi u fitua nga dy shefa kuzhine, një nga të cilët ishte i punësuar në një restorant në pronësi të djalit të Agollit.
Po ashtu, Dritan Agolli është pronar i një kompanie e quajtur ‘Magnum Opus’ group me objekt studime në nivel strategjik, menaxherial, operacional, analiza, vrojtime, sondazhe, konsulencë, shërbime administrative etj.
Kompania rezulton që ka marrë para publike. Agolli ka siguruar para publike përmes nënkontraktimeve dhe kompaninë që u ka dhënë tendera publik.
Ka një marrëdhënie që kreu i FSHZH ka kryer me kompani private, me të cilët i ka lidhur interesi.
Një vit pasi Agolli është emëruar në krye të FSHZH, i biri i tij deklaron se gjyshi i ka dhuruar një shtëpi me sipërfaqe gati 1550 metra/katror, ndërsa Agolli ka deklaruar në institucionin kundër pastrimit të parave se ka shitur një apartament 360 mijë euro, ndërkohë që vlera e tij ka qenë gjysmë për gjysmë në kohën e blerjes.
Me këtë lëvizje ka justifikuar blerjet e apartamenteve dhe garazheve ku ai jeton dhe i ka pronë të tij. Bëhet fjalë edhe për një shumë që do t’ia kalonte biznesit të djalit të tij, 400 mijë euro.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post