Pas kërkesës për përjashtimin e gjyqtarit Medi Bici, Dritan Dajti i kërkoi Gjykatës së Lartë përjashtimin e gjyqtarit Sandër Simoni. Por kjo kërkesë u rrëzua sot. Kërkesa e Dajtit u rrëzua nga gjyqtari Enton Dhimitri si dhe ndaj tij u caktua masë administrative me vlerë 10.000 lekë.
Përjashtimi i Simonit u kërkua me argumentin se ekzistojnë shkaqe të njëanshmërisë së tij dhe se gjatë ushtrimit të funksioneve ka shfaqur mendimin e tij mbi faktet dhe rrethanat objekt të këtij procedimi.
Dritan Dajti u dënua nga shkalla e parë me burgim të përjetshëm për vrasjen e 4 efektivëve Kastriot Feskaj, Altin Dizdari, Sajmir Duçkollari dhe Fatos Xhani, ngjarje e shënuar më 7 gusht të vitit 2009, në Durrës, gjatë një operacioni për arrestimin e tij.
Por, në shkurt të vitit 2019 Gjykata e Apelit e Krimeve të Rënda pranoi kërkesën e Dajtit për gjykim të shkurtuar duke caktuar ndaj këtij të fundit 25 vite burg. Ndërkohë, vendimi i dhënë nga pesë gjyqtaret e Apelit, Fuat Vjerdha kryetar, Lindita Hoxha, Aleks Nikolli, Petrit Aliaj dhe Skender Damini u ankimua nga Prokuroria e Apelit e Krimeve të Rënda, e cila kërkon dënimin e Dajtit me burgim të përjetshëm.
Gjykata e Lartë do ta shtyjë më 11 qershor shqyrtimin e kërkesës së Prokurorisë së Krimeve të Rënda, që kërkon burg përjetë për Dritan Dajtin.
Discussion about this post