Drogë në parqe, qytetarët e Elbasanit të alarmuar: Ka shiringa kudo

Rritja e numrit të përdoruesve të drogës është tashmë një realitet i hidhur në qytetin e Elbasanit.

Në qendrën e rehabilitimit në Elbasan, 73 është numri i personave që aktualisht kërkojnë ndihmë për të lënë drogën. Por ka mijëra të tjerë që vazhdojnë të jenë të varur nga lëndët narkotike. Dëshmitë janë shiringat dhe mbetje të tjera që i gjen lagjen Kala apo dhe tek parku Rinia.

Për banorët, përdoruesit e drograve janë kthyer në shqetësim.

“Aq shqetësuese është sa nuk kemi rehat gjithë natën, këtu vlohet ne kemi dritaren ktu”, thotë një banor.

“Sidomos prej këtu shkojnë te kisha, te kisha bëhet nami. Nuk ka as konroll asgjë. Atje venë pinë drogë e ca nuk bëhet”, shton ai.

Një tjetër banore e zonës shprehet se kanë frikë të çojnë fëmijët në park pasi ka shiringa kudo.

“Po sjellim fëmijët këtu, për mua është shumë problematike sepse cep me i cep shikojmë shumë gjëra shume shiringa të rinjë, dhe mund të trembemi”, tha ajo.

Shëtitjet në parkun “Rinia” janë kthyer në problematike për të gjitha moshat. Vetë qytetarët pranojnë se e kanë të pamundur të afrohen aty gjatë mbrëmjes.

“Shumë e rrezikshme është për shoqërinë për fëmijët, Ne i mbajmë mbyll nuk i nxjerrim fare përjashta”, tha një grua.

“Këtu është pislluk, nuk afrohet njeri këtu”, deklaroi një tjetër qytetar.

Në funksion të përdoruesve janë vendosur edhe qendrat e metadonit, që funksionojnë në shumicën e qyteteve në vend. Referuar shifrave, 60 mijë persona pranojnë që kanë provuar të paktën njëherë lëndë narkotike në jetën e tyre, por numri I përdoruesve është shumëfish më i lartë. 8 mijë është numri i personave që janë konsumator të drograve të forta.