Një operacion antidrogë është zhvilluar ditën e sotme në Shkodër. Burime nga policia bëjnë me dije se është arrestuar një 25- vjeçar dhe është shpallur në kërkim bashkëpunëtori i tij.
Në kuadër të operacionit të koduar “Muzgu” u vu në pranga personi i identifikuar me iniciale A. N. 25 vjeç , banues në fshatin Gramsh, Shkodër, për veprën penale “Kultivimi i bimëve narkotike”.
Gjithashtu, u bë identifikimi si dhe shpallja në kërkim e M. L. , 25 vjeç, banues në fshatin Suka, Dajç, Shkodër, për veprën penale “Kultivimi i bimëve narkotike”, i cili duke përfituar nga errësira dhe terreni i pyllëzuar, ka mundur të largohet. Vijon puna për kapjen e tij.
Nga veprimet e kryera në kuadër të operacionit policor të koduar “Muzgu”, rezultoi se personat në fjalë, në bashkëpunim me njëri-tjetrin, kishin kultivuar, në një zonë të pyllëzuar, në fshatin Dajç, Shkodër, 180 bimë të dyshuara narkotike Cannabis Sattiva të cilat u asgjësuan me anë të djegies.
Shërbimet e Policisë, në bashkëpunim me Prokurorinë, po punojnë për identifikimin dhe arrestimin e personave të tjerë, të cilët janë të implikuar në këtë veprimtari kriminale.
Materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.
Discussion about this post