Muajt e fundit situata e Covid-19 është përkeqësuar ndjeshëm, pasi shtimi i rasteve të reja të infektimit ka bërë që të krijohet kaos në spitalet në Tiranë me shtrimet e shumta. Mesditën e sotme në Spitalin Infektiv i njohur si “Covid-1” ka ndodhur një incident mes familjarëve të një pacienteje që po shtrohej dhe efektiveve të policisë.
Në një video të publikuar në mediat, shihet se si dy të afërmet e një gruaje që sapo u shtrua në spital kanë tentuar që të futen brenda në spital bashkë me të infektuarën, gjë që është rreptësisht e ndaluar. Kur një efektiv policie ka tentuar që t’i ndalojë, ka hasur në kundërshtimin fizik të tyre.
“Dua të hyj brenda vëlla. Në rregull?”- dëgjohet ajo në video.
Situata është qetësuar pasi pranë efektivit kanë mbërritur edhe pjesa tjetër e punonjësve të tjerë të sigurisë së spitalit.
