Prishtina dominoi IPKO Superligën në sezonin e fundit dhe siguroi titullin e 11-të në histori. Ekipi kryeqytetas u rikthye te trofeu i madh pas 8 vitesh dhe do të garojë në Champions League.
Shorti i raundit paraeliminator e vendosi përballë Folgore, skuadrës kampione të San Marinos. Sfidat ishin programuar të luheshin në Torshavn, kryeqytetin e Ishujve Faroe, por një gjë e tillë nuk do të ndodhë.
Me anë të një postimi në rrjetet sociale, Prishtina bën të ditur që miniturneu i tipit “Final Four” do të zhvillohet në Shqipëri. Gjysmëfinalja mes Prishtinës dhe Folgore do të luhet në “Elbasan Arena” më 22 qershor, ndërsa gjysmëfinalja tjetër në “Niko Dovan” të Durresit. Në Elbasan do të zhvillohet edhe finalja e madhe.
“Prishtina me Folgoren luan në Elbasan. Ndryshon vendi i turnirit. Prishtinë, 9 qershor 2021 – Turniri i raundit preliminar i UEFA Champions League do të zhvillohet në Shqipëri, konkretisht në Durrës dhe Elbasan dhe jo siç ishte paraparë më herët në kryeqytetin e Ishujve Faroe, Torshavn.
Prishtina dhe Folgore do të takohen në “Elbasan Arena” më 22 qershor nga ora 20:00. Edhe finalja e turnirit do të zhvillohet në Elbasan më 25 qershor nga ora 20:00, kurse gjysmëfinalja tjetër në Durrës. Lajmin shumë shpejtë pritet të konfirmojë edhe UEFA“, lexohet në postimin zyrtar të kampionëve të futbollit dardan.
