Në protestën që po zhvillohet sot edhe studentët kanë paraqitur disa kërkesa për qeverinë. Ata shprehen se Rama i gënjeu njëherë për disa premtime që nuk i mbajti kurrë, por tani ata nuk do ta lejojnë më. Tepër të revoltuar, me dhjetëra studentë i kërkojnë Ramën të largohet pasi po rrjep qytetarët e thjeshtë dhe mbush xhepat e oligarkëve.
“Kush mbjell uri, do korrë revoltë”, shkruhet në banderolën më të madhe që mbajnë në duar një grup studentësh që iu bashkuan protestës qytetare që po zhvillohet para Kryeministrisë kundër rritjes së çmimeve. “Po nuk ranë çmimet, do bjerë qeveria”, janë thirrjet e vazhdueshme të studentëve, që ndodhen në bulevardin “Dëshmorët e Kombit”.
Sipas tyre, kjo nuk është një protestë politike, por me kërkesa ekonomike. “Rritja e çmimeve godet studentët, dhe mendojeni që shumica e studentëve jetojnë me të ardhura nga prindërit. Duhet një paketë ndihmash edhe për studentët”, tha një student, ndërsa shprehen se nuk përballojnë dot çmimet e qirave që kanë shkuar në stratosferë edhe për një garsoniere të thjeshtë.
Discussion about this post